«Ակբա-կրեդիտ ագրիկոլ» բանկն առաջարկում է բանկ-հաճախորդ հարաբերությունների նոր ձևաչափ

«Ակբա-Կրեդիտ ագրիկոլ» բանկի «ԱԿԲԱ Բիզնես Փարթնըր» ենթաբրենդի և բիզնեսի օպտիմալացմանն ուղղված ծառայությունների մասին Tert.am-ը զրուցել է «Ակբա-Կրեդիտ ագրիկոլ» Բանկի Բիզնեսի զարգացման վարչության պետ Արսեն Մելքոնյանի հետ:

-Պարո՛ն Մելքոնյան, գիտենք, որ 2014թ-ի հոկտեմբերից «Ակբա-Կրեդիտ ագրիկոլ» բանկը իր հաճախորդներին ներկայացրեց «ԱԿԲԱ Բիզնես Փարթնըր» ենթաբրենդը: Ի՞նչ է իրենից ներկայացնում և ում համար է այն նախատեսված:

-«ԱԿԲԱ Բիզնես Փարթնըր» ենթաբրենդը ստեղծված է փոքր և միջին բիզնեսի համար: Այն միտված է ընդգծելու բանկի պատրաստակամությունը փոքր, միջին բիզնեսին սատարելու և նոր գործընկերային հարաբերություններ հաստատելու փաստը: Ճիշտ է, մենք շուրջ 16 տարի է, ինչ փոքր և միջին բիզնեսի կողքին ենք և բազմաթիվ նորամուծությունների հեղինակ ենք այս ոլորտում, սակայն ժամանակները փոխվում են, և հաճախորդներին ավելի ու ավելի նոր մոտեցումներ են գրավում: Ենթաբրենդն իր տանիքի տակ է խմբավորում բիզնեսին ուղղված բանկի բոլոր առաջարկները: Իսկ հիմքում դրված է գործընկերության գաղափարը: Շեշտը դրվում է այն բանի վրա, որ ցանկացած հաճախորդի համար շահավետ լինի բանկային ամբողջ սպասարկումը ստանալ «Ակբա-Կրեդիտ ագրիկոլ» բանկում' այլևս կարիք չունենալով գործընկերներ փնտրել այլ ֆինանսական կազմակերպություններում:

Եթե խոսելու լինենք արդյունքների մասին, ապա միայն նախորդ տարվա երկրորդ կիսամյակի ընթացքում իրավաբանական անձ հաճախորդների թիվը, ի հաշիվ նոր հաճախորդների, աճել է 15%-ով, որը, կարծում եմ, բացառիկ ցուցանիշ է, եթե հաշվի առնենք, որ դրանք հաճախորդներ էին, որոնք երբևէ «Ակբա-Կրեդիտ ագրիկոլ» բանկում հաշիվներ չեն ունեցել:

Իհարկե, Երևան քաղաքում բանկի ավելի ընդգծված ներկայացվածությունը նույնպես իր արդյունքները տվեց:

- Բացի ֆինանսական ծառայություններից, «Ակբա-Կրեդիտ ագրիկոլ» բանկն ինչո՞վ է օժանդակում իր հաճախորդներին։

-2014թ. սկզբից բանկը ձեռնամուխ եղավ իր հաճախորդների համար դասընթացների կազմակերպման գործին: Նախապես ընտրվել են 4 թեմաներ, որոնք առավել հետաքրքրում են ձեռնարկատիրությամբ զբաղվողներին: Դրանք վերաբերում են կանխիկ դրամական հոսքերի կառավարմանը, ծախսերի վերահսկողությանը, բիզնես ցիկլերին և շրջանառու միջոցների կառավարմանը:

Հանդիպումների ընթացքում քննարկվում են այս թեմաներին վերաբերող բազմաթիվ հարցեր, տրվում են պատասխաններ կամ լուծումներ՝ ամենատարբեր իրավիճակների համար, և ընդհանրապես փորձում ենք հաճախորդին տալ այն ամենը, ինչը կարող է օգնել նրանց՝ ավելի հմտորեն վարել իրենց գործունեությունը:

Առայժմ այդ սեմինարները կազմակերպվել են միայն բանկի հաճախորդների համար, սակայն աշնանը պետք է ձեռնարկենք հանդիպումներ՝ արդեն ոչ միայն բանկի հաճախորդների համար: Այսինքն՝ սեմինարներին կկարողանան մասնակցել նաև բանկի հաճախորդ չհանդիսացող իրավաբանական անձանց ներկայացուցիչներ կամ անհատ ձեռնարկատերեր: Այդ մասին հայտարարություններ կլինեն բանկի www.acba.am կայք էջում և մասնաճյուղերում։ Ինչպես նաև հնարավոր կլինի զանգահարել բանկի հեռախոսային կենտրոն, որտեղ նույնպես կկատարվի մասնակիցների նախնական գրանցում:

Ցավոք, բոլոր ցանկացողներին հնարավորություն չենք ունենա ընդգրկել առաջիկա խմբերում, սակայն համոզված եմ, որ բոլորի հետ ժամանակի ընթացքում կկարողանանք կիսել մեր փորձը:

Մենք պետք է հավատարիմ մնանք բանկի նոր ենթաբրենդի կարգախոսին՝ ԱԿԲԱ Բիզնես Փարթնըր՝ Ձեր գործընկերը բիզնեսում: