Առաջին փուլով ԵՊՀ է դիմել 3448 դիմորդ

Գիտություն և Մշակույթ 23 Հունիս, 2015 13:12

Երևանի պետական համալսարան առաջին փուլով դիմել է 3448 դիմորդ:

ԵՊՀ ընդունող հանձնաժողովի պատասխանատու քարտուղարի տեղակալ Ժակ Մանուկյանի խոսքով՝ թեև հանրապետությունում դիմորդների թիվը նվազել է, սակայն ԵՊՀ դիմածների թիվը նախորդ տարվա ցուցանիշից էականորեն չի տարբերվում:

«Նախորդ տարի առաջին փուլով դիմել է 3601 դիմորդ: Տարբերությունը չնչին է: Սա վկայում է, որ ԵՊՀ-ն կարողանում է ժամանակին և կրթական որակներին համահունչ գիտելիք մատուցել ուսանողներին»,- «Արմենպրես»-ի փոխանցմամբ՝ նշեց Ժակ Մանուկյանը:

Նրա խոսքով՝ ամենապահանջված ֆակուլտետների առումով ևս այս տարի էական փոփոխություն չկա: «Իրավագիտություն, միջազգային հարաբերությունններ, հանրային կառավարում. ավանդաբար պահանջված մասնագիտություններ են: Բայց բնագիտական թևում աճ է նկատվել՝ օրինակ մեխանիկայի, միջուկային ֆիզիկայի, դեղագիտության գծով: Չկա ֆակուլտետ, որտեղ դիմորդ չկա»,- նշեց Ժակ Մանուկյանը:

Նրա խոսքով՝ միասնական քննությունների երկրորդ փուլը կանցկացվի հունիսի 25-ից հուլիսի 8-ը, իսկ երրորդ փուլում դրական միավորներ ստացածները կարող են հայտ ներկայացնել թափուր տեղերի համար:

«Որքան հետևում եմ՝ բոլոր առարկաների գծով բարձր միավորներ են»,- հավելեց ԵՊՀ ընդունող հանձնաժողովի պատասխանատու քարտուղարի տեղակալը:

Նրա խոսքով՝ ամբողջական պատկերը հայտնի կդառնա, երբ ավարտվի քննական ողջ գործընթացը:

Տասնմեկ հազարից ավելի դիմորդ այս տարի հունիսի 2-ից մասնակցում է միասնական քննությունների: Քննություններն անցկացվում են հանրապետության 34 քննական կենտրոններում: Առաջին փուլն ավարտվում է «Ռուսաց լեզու» առարկայի քննությամբ՝ հունիսի 23-ին: