Մասնագետները տարակարծիք են Երևանում սելավի հնարավորության հարցում

Հորդառատ անձրևների դեպքում Երևանում բացառված չէ սելավների վտանգը:

Այս մասին լրագրողների հետ հանդիպման ժամանակ հայտարարեց հիդրոլոգ Ռոլանդ Մանուկյանը' նշելով, որ մայրաքաղաքում խորհրդային տարիներին կառուցված պաշտանիչ ավազաններն ու կոյուղիները տարիների ընթացքում վերացվել են:

«Այն, ինչ խորհրդային տարիներին կառուցվել է որպես պաշտպանիչ համակարգ, ներկայումս վերացված է: Ուժեղ անձրևների պարագայում մեծ է վտանգը, որ գոյացած սելավը կփակի փողոցները: Եթե կրկնվեն 1946 թվականի անձրևները, ապա սելավն անխուսափելի կլինի»,- «Արմենպրես»-ի փոխանցմամբ' ասաց Մանուկյանը:

Հիդրոլոգի հետ համաձայն չէր ճարտարապետ Գուրգեն Մուշեղյանը, ով վստահեցնում էր, թե խորհրդային տարիներին Երևանում կառուցվել են բարձր թողունակությամբ սելավատարեր: «Խնդիրն այն է, որ ենթակառուցվածքներից շատերը երկար տարիներ չեն վերականգնվել: Դրանք պետք է պարբերաբար վերակառուցել և պահել կարգին վիճակում»,- ասաց նա: Մուշեղյանը նշեց, որ Նորքի տարածքում, որտեղ սելավատարները լավ վիճակում են, հնարավոր չեն հեղեղումներ, սակայն անհրաժեշտ է մյուս հատվածներում էլ ապահովել նույն իրավիճակը:

Ջրաբան-փորձագետ Քնարիկ Հովհաննիսյանն էլ հավելեց, որ Երևանում մեծ ձնհալի դեպքում անգամ լուրջ խնդիրներ կարող ենք ունենալ: «Խորհրդային միության տարիներին, բացի կենցաղային կոյուղուց, Երևանում կառուցվել էր նաև սելավատար կոյուղի, որը հիմա խցանված է, և հեղեղումների ժամանակ չի կարող կատարել իր գործառույթը»,- ասաց նա: