Պեսկովը հայտարարել է Սիրիայում ցամաքային գործողություն անցկացնելու անհրաժեշտության մասին

ՌԴ նախագահ Վլադիմիր Պուտինի մամուլի քարտուղար Դմիտրի Պեսկովը նշել է, որ անհնար է «Իսլամական պետության» նկատմամբ հաղթանակի հասնել առանց ցամաքային գործողության, որով զբաղվում է Սիրիայի բանակը: Այս մասին մամուլի քարտուղարը հայտնել է BBC-ին տված հարցազրույցում:

«Մեր նպատակը սիրիական բանակի օրինական դիրքերն ամրապնդելն է, քանի որ այլ ճանապարհ գոյություն չունի: Եկեք չմոռանանք դրա մասին, և ես կարծում եմ, որ ինձ հետ կհամաձայնեն բոլոր ռազմական փորձագետները, որ մենք կարող ենք ամիսներ և տարիներ շարունակ ռմբակոծել ահաբեկիչների դիրքերը, մենք կարող ենք ցանկացած քանակությամբ անօդաչուներ կիրառել Սիրիայում, կամ կարող ենք շարունակել օդային գործողությունները, սակայն դա նշանակալի արդյունքներ չի բերի առանց ցամաքային գործողության: Եվ միակ տերությունը, որ կարող է իրականացնել այդ ցամաքային գործողությունը ահաբեկիչների դեմ՝ Սիրիան է», - ասել է Պեսկովը:

«Միայն ահաբեկիչներին հաղթելուց հետո մենք կարող ենք անդրադառնալ ճշմարիտ քաղաքական կարգավորմանը, սակայն այս պահին դրան անհնար է հասնել», - հավելել է նա: «Մենք չենք կարող խոսել քաղաքական կարգավորման մասին, երբ կա Դամասկոսին կորցնելու վտանգ: - Մենք չենք կարող վստահ լինել, առանց արտաքին աջակցության, որն այդ օրերին գալիս է Ռուսաստանից, Ռուսաստանի ռազմաօդային ուժերի գործողություններից, որ Դամասկոսը մի քանի ամսից չի ընկնի ահաբեկիչների հարվածի տակ»: