Վիտալի Կլիչկոն առաջատարն է Կիևի քաղաքապետի ընտրություններում

Կիևի գործող քաղաքագլուխ Վիտալի Կլիչկոն հաղթում է ընտրությունների առաջին փուլում: Ինչպես տեղեկացնում է «Արմենպրես»-ը՝ հղում անելով «Ուկրաինայի ընտրողների կոմիտե» հասարակական կազմակերպության սոցիոլոգների տվյալներին, Կլիչկոն հավաքում է ընտրողների ձայների 40,4 տոկոսը:

Նրա մերձավոր մրցակիցը՝ «Բատկիվշինա» կուսակցությունից թեկնածու Վլադիմիր Բոնդարենկոն, ստանում է ձայների 8,7 տոկոսը, երրորդ տեղում, նախնական տվյալներով, Կիևի նախկին քաղաքագլուխ Ալեքսանդր Օմելչենկոն է՝ 8,1 տոկոս ձայներով:

Եթե ընտրական հանձնաժողովը հաստատի այս թվերը, կնշանակվի քվեարկության երկրորդ փուլ, քանի որ Ուկրաինայի օրենսդրության համաձայն, եթե ավելի քան 90 հազար բնակիչ ունեցող քաղաքի պետի ընտրություններում թեկնածուն չի հավաքում ձայների 50 տոկոսը, անցկացվում է երկրորդ փուլ:

Երկրորդ փուլ է սպասվում նաև Լվովում, Դնեպրոպետրովսկում և Օդեսայում:

Հոկտեմբերի 25-ին Ուկրաինայում տեղի են ունեցել իշխանության տեղական մարմինների ընտրություններ, որոնց ընթացքում ընտրվել են մարզային և շրջանային նշանակության 358 քաղաքների քաղաքապետեր, ինչպես նաև մարզային ու շրջանային խորհուրդների պատգամավորներ: Ընտրություններ չեն անցկացվել Դոնեցկի և Լուգանսկի մարզերի այն մասերում, որոնք վերահսկում են ինքնահռչակ ԴԺՀ-ն և ԼԺՀ-ն, ինչպես նաև Դոնեցկի մարզի 91 և Լուգանսկի մարզի 31 բնակավայրերում, որոնք վերահսկվում են Կիևի կողմից: Դրանցում, ինչպես նշում են Ուկրաինայի իշխանությունները, հնարավոր չէ ապահովել ընտրողների և ընտրական հանձնաժողովների անդամների անվտանգությունը: