Ռուսաստանի հետ երկխոսությունն այլընտրանք չունի. Ղարիբաշվիլի

Վրաստանը հանդես է գալիս «Ռուսաստանի հետ հարաբերությունները նորմալացնելու օգտին»: Այդ մասին, ինչպես տեղեկացնում է «Արմենպրես»-ը, Վրաստանի վարչապետ Իրակլի Ղարիբաշվիլին հայտարարել է Հարավային Կովկասի անվտանգության հարցերին նվիրված միջազգային խորհրդաժողովում, որը հոկտեմբերի 26-ին բացվել է Թբիլիսիում:

«Չնայած Վրաստանի նկատմամբ ՌԴ-ի՝ մեզ համար անընդունելի մի շարք գործողություններին, մենք հանդես ենք գալիս Ռուսաստանի հետ հարաբերությունները նորմալացնելու և այդ կարևորագույն հարցում պրագմատիկ մոտեցման օգտին»,- նշել է Ղարիբաշվիլին: Նրա խոսքով՝ «Վրաստանի կառավարությունը վերջին տարիներին կոնկրետ քայլեր է ձեռնարկել առևտրի, տրանսպորտի, զբոսաշրջության, մշակույթի, մարդկանց միջև շփումների և բոլոր այն ոլորտներում Ռուսաստանի հետ համագործակցության վերականգնման ու զարգացման ուղղությամբ, որտեղ դա հնարավոր է եղել»:

Ղարիբաշվիլին այն կարծիքին է, որ «ՌԴ-ի հետ հարաբերությունները նորմալացնելու շուրջ երկխոսությունն այլընտրանք չունի»:

Մինչդեռ Վրաստանի խորհրդարանի նախկին նախագահ Նինո Բուրջանաձեն հանրապետության ղեկավարությանն առաջարկում է «ավելի ակտիվ ուղղակի քայլեր ձեռնարկել ՌԴ-ի հետ հարաբերությունների նորմալացման ուղղությամբ և սկսել Վրաստանի ևՌԴ-ի ղեկավարների հանդիպման նախապատրաստումը», հաղորդել է ՏԱՍՍ-ը: