Պուտինը ողջույնի ուղերձ է հղել ԱՊՀ-ի հատուկ ծառայությունների ղեկավարների խորհրդակցության մասնակիցներին

Մերձավոր Արևելքում և Հյուսիսային Աֆրիկայում աճող ահաբեկչական ակտիվությունը տարբեր պետությունների հատուկ ծառայությունների փոխգործակցության բարելավում է պահանջում: Այդ մասին, ինչպես տեղեկացնում է «Արմենպրես»-ը, ասված է ԱՊՀ-ի անդամ պետությունների անվտանգության մարմինների և հատուկ ծառայությունների ղեկավարների՝ Մոսկվայում ընթացող խորհրդակցության մասնակիցներին Ռուսաստանի նախագահ Վլադիմիր Պուտինի հղած ողջույնի ուղերձում, որն ընթերցել է Ռուսաստանի անվտանգության դաշնային ծառայության տնօրեն Ալեքսանդր Բորտնիկովը:

«Աշխարհում ստեղծվող աշխարհաքաղաքական իրադրությունը թելադրում է արդի մարտահրավերներին ու սպառնալիքներին հակազդելու նոր արդյունավետ ուղիներ գտնելու անհրաժեշտությունը»,- ընդգծվում է պետության ղեկավարի ողջույնի ուղերձում:

«Այսօր առանձնակի վտանգ է ներկայացնում աճող ահաբեկչական ակտիվությունը, անդրազգային կազմակերպված հանցավորության հետ արմատական խմբավորումների միավորվելը: Խիստ մտահոգություն է առաջացնում Մերձավոր Արևելքի և Հյուսիսային Աֆրիկայի իրադրությունը: Ահաբեկիչները փորձում են այս տարածաշրջանն օգտագործել որպես հենակետ, որտեղ հավաքագրում և ուսուցանում են զինյալների, որոնք կարող են օգտագործվել այլ երկրներում իրադրության ապակայունացման համար»,- նշվում է ուղերձում:

Այդ կապակցությամբ, ինչպես ընդգծել է ՌԴ նախագահը, «կարևոր է անշեղորեն բարձրացնել փոխգործակցության մակարդակը, օգտագործել գործունեության աեմենաժամանակակից ձևերն ու մեթոդները, մշակել խնդիրների լուծման միասնական մոտեցումներ, հաղորդել է ՏԱՍՍ-ը: