Ադրբեջանի ԱԱՆ ռազմական հակահետախուզության պետը պաշտոնանկ է արվել

Ադրբեջանի նախագահ Իլհամ Ալիևի հրամանագրով հոկտեմբերի 17-ին երկրի Ազգային անվտանգության նախարար Էլդար Մահմուդովի խայտառակ պաշտոնանկությունից անմիջապես հետո նախարարության աշխատակիցների նկատմամբ սկսված քրեական գործով արդեն 15 մարդ է ձերբակալվել:

Ինչպես հաղորդում է «Արմենպրես»-ը' վկայակոչելով ադրբեջանական ԶԼՄ-ները, ԱԱՆ պաշտոնակատար Մադաթ Գուլիևի հրամանագրով երեկ պաշտոնանկ է արվել ԱԱՆ ռազմական հակահետախուզության վարչության պետ Նիզամի Շիրինովը:

Նիզամի Շիրինովը երկար ժամանակ ծառայել է Ադրբեջանի ազգային անվտանգության նախարարությունում, իսկ մինչ այդ նա հանդիսացել է Ադրբեջանի նախագահին կից Հատուկ վարչության աշխատակից:

Նախօրեին զբաղեցրած պաշտոններից հեռացվել էին ԱԱՆ 9 բարձրաստիճան աշխատակիցներ, այդ թվում՝ 4 գեներալ:

ԱԱՆ աշխատակիցներին զուգահեռ, ձերբակալվածների մեջ են նաև Կապի և բարձր տեխնոլոգիաների նախարարության նախկին աշխատակիցներ, որոնք կասկածվում են Ադրբեջանի բարձրաստիճան պաշտոնյաների' այդ թվում նախագահի և նրա ընտանիքի անդամների հեռախոսների գաղտնալսման մեջ:

Բոլոր ձերբակալվածները պահվում են արդարադատության նախարարության Բաքվի թջվ 1 հետաքննչական մեկուսարանում:

Անդրադառնալով Էլդար Մահմուդովին աշխատանքից հեռացվելու պատճառին՝ մասնավորապես moderator.az կայքը գրել էր, որ գլխավորապես դա կապված է այն բանի հետ, որ ձերբակալված աշխատակիցներն Էլդար Մահմուդովի հանձնարարությամբ լսել են Ադրբեջանի նախագահի, նրա ընտանիքի անդամների, ինչպես նաև իշխանության բարձրաստիճան անձանց և նրանց ընտանիքների հեռախոսային խոսակցությունները, ինչը, սովորաբար, արվում է երկրում «հեղաշրջում» իրականացնելուց առաջ:

Ադրբեջանական ԶԼՄ-ներն ԱԱՆ-ը 11 տարի ղեկավարած Էլդար Մահմուդովի պաշտոնանկության հնարավոր պատճառներից են համարում նաև երկրի Միջազգային բանկի նախկին ղեկավար Ջահանգիր Հաջիևի հետ կոռուպցիոն կապերը, սեփական ապօրինի բիզնեսները և այլն:

«Ազադլըգ» թերթն էլ գրել է, որ «բոլոր դեպքերում, ԱԱՆ երկարամյա ղեկավարին «հարվածելը» ցույց է տալիս, որ իշխանության ներսում խարդավանքներն ուժգնանում են, և ներիշխանական խմբավորումների միջև պայքարը հասել է գագաթակետին»: