Ադրբեջանի իշխանությունն ընտրական տագնապի մեջ է

Ադրբեջանի իշխանությունը խիստ անհանգստացած է նոյեմբերի 1-ին անցկացվելիք խորհրդարանական ընտրությունների հետ կապված քարոզչությունը դժգույն մթնոլորտում անցկացնելով և ընտրությունների դիտորդությունից միջազգային կազմակերպությունների հրաժարվելով: Այդ պատճառով իշխանությունն աշխատում է ամեն կերպ անտեսել ընտրությունների հետ կապված ԵԱՀԿ-ի կարծիքը, ընտրություններին հետևելուց այդ կառույցի հրաժարվելու փաստը, ինչպես նաև այն, որ ԱՄՆ-ում Ադրբեջանի հետ կապված ընտրական քննարկումներ են անցկացվում: Բացի այդ, ընտրություններին մասնակցությունից հրաժարվել են ադրբեջանական բոլոր ընդդիմադիր և դեմոկրատական ուժերը:

Ինչպես հաղորդում է «Արմենպրես»-ը, Ադրբեջանում առաջիկա ընտրությունների հետ կապված «Ազադլըգ» թերթի հետ զրույցում Ժողովրդական ճակատ կուսակցության գլխավոր խորհրդի նախագահ Հասան Քարիմովն ասել է, թե իշխանությունը հասկանում է, որ ընտրությունների դիտորդությունից միջազգային կազմակերպությունների հրաժարումից հետո ԵԱՀԿ-ում, Եվրոպայի Խորհրդում պաշտոնական Բաքվի վիճակը ծանր է լինելու:

Նշելով, որ միջազգային կազմակերպություններին անտեսելու նման քարոզչությամբ իշխանությունն աշխատում է հասարակական կարծիքն ուղղել իր օգտին, Քարիմովն ասել է. «Իշխանությունը լավ գիտի, որ ժողովուրդը բոյկոտել է ընտրությունները: Իսկ միջազգային կազմակերպությունների' ընտրությունների դիտորդությունից հրաժարվելուց հետո իշխանության վիճակը ԵԱՀԿ-ում և Եվրոպայի Խորհրդում ավելի է վատանալու: Նման վերաբերմունքը օրակարգ է բերում Ադրբեջանի դեմ պատժամիջոցներ կիրառելու պահանջ: Այդ է պատճառը, որ իշխանությունը հայտնվել է ընտրական տագնապի մեջ»: