Վիեննայում Սիրիայի շուրջ հանդիպման մասնակիցները կփորձեն հաղթահարել տարաձայնությունները

Ավստրիայի մայրաքաղաք Վիեննայում հոկտեմբերի 30-ին տեղի կունենա Սիրիայի իրադրության կարգավորմանը նվիրված բազմակողմ հանդիպում այն պայմաններում, երբ դրա մասնակիցների միջև խորը տարաձայնություններ են պահպանվում այն հարցի շուրջ, թե ինչ քայլեր պետք է ձեռնարկվեն արդեն ավելի քան չորս տարի շարունակվող քաղաքացիական պատերազմին վերջ տալու համար: Միևնույն ժամանակ այդ ուղղությամբ խաղաղապահ ջանքերի ակտիվացումը և խորհրդաժողովի մասնակիցների կազմի ընդլայնումը թույլ են տալիս հուսալ, որ կհաջողվի հասնել եթե ոչ բեկման, ապա գոնե հակամարտության դադարեցման նպատակով կոնկրետ ուղիների որոնման: Ամենահամեստ հաշվարկներով՝ դրա զոհ է դարձել ավելի քան 200 հազար մարդ, միլիոնավոր բնակիչներ լքել են հարազատ վայրերը, և ամբողջ տարածաշրջանի վրա կախվել է սուր ու ընդգրկուն հակամարտության իրական սպառնալիքը:

Ինչպես տեղեկացնում է «Արմենպրես»-ը, Վիեննայում բանակցությունների ներկայիս մեկօրյա փուլին չորս անգամ ավելի շատ պատվիրակություններ են մասնակցում, քան մեկ շաբաթ առաջ, երբ Դանուբի ափի քաղաքում հավաքվել էին Ռուսաստանի, ԱՄՆ-ի, Թուրքիայի և Սաուդյան Արաբիայի արտաքին քաղաքական գերատեսչությունների ղեկավարները: Այս անգամ ցուցակն զգալիորեն ընդլայնված է, իսկ ամենամեծ նորությունը դարձել է Իրանին բանակցությունների սեղանի շուրջ հրավիրելը:

Հանդիպմանը պետք է մասնակցեն նաև Ռուսաստանի, ԱՄՆ-ի, Սաուդյան Արաբիայի, Թուրքիայի, Արաբական Միացյալ Էմիրությունների, Քաթարի, Հորդանանի, Գերմանիայի, Ֆրանսիայի, Եգիպտոսի, Իտալիայի, Մեծ Բրիտանիայի, Իրաքի և Լիբանանի պատվիրակությունները: Բանակցություններին կմիանան նաև ՄԱԿ-ի գլխավոր քարտուղարի՝ Սիրիայի գծով հատուկ պատվիրակ Ստեֆան դե Միստուրան և ԵՄ-ի արտաքին քաղաքական ծառայության ղեկավար Ֆեդերիկա Մոգերինին:

Ինչպես նշում է ՏԱՍՍ-ը, բազմակողմ ձևաչափով հանդիպմանը նախորդել են նախօրյակին կայացած մի շարք երկկողմ հանդիպումները, ինչպես նաև Վիեննայի «քառյակի» նիստը՝ ՌԴ-ի, ԱՄՆ-ի, Սաուդյան Արաբիայի և Թուրքիայի ԱԳ նախարարների մասնակցությամբ: