A321 ինքնաթիռում «ոչ բնորոշ ձայներ» են լսվել. օդաչուների բանակցությունների վերծանումը

Եգիպտոսում կործանված Airbus A321 ինքնաթիռի օդաչուները մինչև աղետի պահն ինքնաթիռում անսարքությունների մասին տեղեկություն չեն ունեցել: Այս մասին «Ինտերֆաքսին» հայտնել է Կահիրեում տեղեկացված աղբյուրը:

«Դիսպետչերների հետ թռիչքի անձնակազմի խոսակցության զրույցի ձայնագրությունից հետևում է, որ ռադարներից ինքնաթիռի անհետանալուց 4 րոպե առաջ իրավիճակն ինքնաթիռում աշխատանքային է եղել, անձնակազմը սովորական բանակցություններ է վարել դիսպետչերների հետ, ոչինչ չի մատնանշել ինքնաթիռում խնդիրներ, անձնակազմը ևս դրանց մասին չի հայտնել»,- պատմել է աղբյուրը:

Աղբյուրը հավելել է, որ ռադարներից ինքնաթիռի անհետացման պահին ձայնագրության մեջ նախորդում են «աշխատանքային թռիչքին ոչ բնորոշ ձայներ», սակայն օդաչուներն աղետի ազդանշան չեն տվել: «Դատելով ձայնագրությունից՝ ոչ աշխատանքային իրավիճակն ինքնաթիռում տեղի է ունեցել հանկարծակի և անսպասելի է եղել թռիչքի անձնակազմի համար»,- նշել է նա:

Հիշեցնենք՝ Շարմ էլ Շեյխ-Սանկտ Պետերբուրգ չվերթն իրականացնող ինքնաթիռը կործանվել է հոկտեմբերի 31-ին Սինայի թերակղզու օդային տարածքում՝ թռիչքից 23 րոպե անց։ Հայտնի է, որ 217 ուղևորով և 7 հոգանոց անձնակազմով ինքնաթիռը պայթել է օդում։