Փորձագետները А321-ի ուղևորների մոտ պայթյունային վնասվածքներ են հայտնաբերել

LifeNews-ի տրամադրության տակ են հայտնվել Եգիպտոսում A321 օդանավի կործանման հետևանքով զոհված մարդկանց մարմինների դատաբժշկական փորձաքննության արդյունքները: Ընդհանուր առմամբ, Սանկտ Պետերբուրգի դիահերձարաններում հայտնվել է կենսաբանական նյութերի ավելի քան 200 բեկոր, որոնցից փորձագետներին հաջողվել է «հավաքել» շուրջ 150 մարմին:

Կործանված օդանավի բոլոր ուղևորները բաժանվել են երկու խմբի: Առաջին խմբում ընդգրկվել են այն մարդիկ, որոնց մարմինները հայտնաբերվել են ինքնաթիռի հիմնական մասի անկման տարածքում: Իսկ երկրորդ խմբում ներառվել են այն ուղևորները, որոնց մնացորդները գտնվում էին Airbus-ի պոչային մասից ոչ հեռու և բեկորների մեջ:

Նրանք, ովքեր նստած են եղել օդանավի դիմային հատվածում՝ ստացել են կրծքավանդակի, որովայնի և կոնքի բութ վնասվածքներ, վերին և ստորին վերջույթների բազմաթիվ կոտրվածքներ, և ներքին օրգանների պատռվածք: Մարդկանց մահը վրա է հասել արյան սուր կորստի, շոկի և գանգուղեղային վնասվածքի պատճառով:

Դատաբժշկական փորձագետներ, ովքեր անցկացրել են իքնաթիռի պոչային մասում գտնվող ուղևորների մարմինների ուսումնասիրությունը, հայտնաբերել են, որ իրենց վնասվածքների բնույթը զգալիորեն տարբերվում է առաջին խմբից: Ինչպես հայտնի է դարձել LifeNews-ին, զոհերից մեծ մասի մոտ ախտորոշվել են այսպես կոչված պայթյունային տրավմաներ՝ փափուկ հյուսվածքների ավելի քան 90 տոկոսի բազմաթիվ այրվածքներով:

Ուղևորների այրված հյուսվածքների մասերն արդեն ուղարկվել են անալիզի:

Հիշեցնենք՝ Շարմ էլ Շեյխ-Սանկտ Պետերբուրգ չվերթն իրականացնող «Կոգալիմավիա» ընկերության Airbus-321 օդանավը հոկտեմբերի 31-ին՝ Երեւանի ժամանակով ժամը 07։51-ին, դուրս է եկել Եգիպտոսից եւ թռիչքից 23 րոպե անց անհետացել ռադարների էկրաններից։ Օդանավում եղել է 217 ուղեւոր եւ անձնակազմի 7 անդամ։ Նրանցից ոչ ոք ողջ չի մնացել։