Ուկրաինական միլիցիան դարձել է ոստիկանություն

Ուկրաինայում նոյեմբերի 7-ից ուժի մեջ է մտնում «Ազգային ոստիկանության մասին» №580-VIII օրենքը, որը դադարեցնում է միլիցիայի գործունեությունը և գործողության մեջ է դնում Ուկրաինայի ազգային ոստիկանություն իրավաբանական անձը: «Նոյեմբերի 7-ին ուժի մեջ է մտնում «Ազգային ոստիկանության մասին» օրենքը: Գործող միլիցիայի աշխատակիցների մի մասը Ազգային ոստիկանությունում համապատասխան պաշտոններում կնշանակվեն որպես ժամանակավոր պաշտոնակատարներ»,- «Արմենպրես»-ի հաղորդմամբ' ֆեյսբուքյան իր էջում գրել է Ուկրաինայի ներքին գործերի նախարար Արսեն Ավակովը:

Նա ընդգծել է, որ միլիացիան ոստիկանությունով փոխարինելու գործընթացում դիտարկվել է անցումային ժամանակահատված: «Մի քանի ամիսների ընթացքում դեռևս կլինեն կադրային փոփոխություններ և թեստավորում, դեռևս մի քանի շաբաթ շրջանառության մեջ կլինի նախկին հագուստը...Բայց վերջ: Միլիցիան այսօր փակվել է: Ժամը 8:00-ից Ուկրաինայի ազգային ոստիկանություն իրավաբանական անձը և օրենքը մտնում են ուժի և իրենց լիազորությունների մեջ»,- հայտարարել է Ավակովը:

Ինչպես ավելի վաղ տեղեկացվել էր' Ուկրաինայի նախարարների կաբինետն Ազգային ոստիկանության ղեկավար է նշանակել Խատիա Դեկանոիձեին, իսկ նոյեմբերի 6-ին Ավակովն Ազգային ոստիկանության ղեկավարի տեղակալ է նշանակել Պարեկային ծառայության ղեկավար Ալեքսանդր Ֆացևիչին: