ՆԱՏՕ-ն օգնում է Ռումինիայի մայրաքաղաքում հրդեհից տուժածներին

ՆԱՏՕ-ի հրամանատարությունը հայտնել է, որ ինքնաթիռներ է տրամադրել հոկտեմբերի 30-ին Ռումինիայի մայրաքաղաքի գիշերային ակումբներից մեկում հրդեհից տուժած 12 հոգու Մեծ Բրիտանիայի և Նորվեգիայի հիվանդանոցներ տեղափոխելու համար, տեղեկացնում է «Արմենպրես»-ը՝ հղում անելով BBC-ին:

Ռումինիայի առողջապահության նախարարությունը հաղորդել է, որ արդեն 21 մարդ է ուղարկվել Եվրոպայի այլ երկրների, ինչպես նաև Իսրայելի հիվանդանոցներ:

Բուխարեստի Colectiv գիշերային ակումբում տեղի ունեցած հրդեհի և պայթյունի հետևանքով զոհվել է 45 մարդ, մի քանի տասնյակ քաղաքացիներ գտնվում են հիվանդանոցներում, նրանցից ավելի քան 30-ը ծանր վիճակում են:

Ինչպես հայտնել է ոստիկանությունը, նախնական տվյալներով՝ հրդեհը բռնկել է համերգի ընթացքում հրատեխնիկայի օգտագործման և անվտանգության կանոնները չպահպանելու պատճառով. նշվում է, որ ակումբում հարյուրավոր մարդիկ էին գտնվում, իսկ փրկաելքերը քիչ են եղել:

Գիշերային ակումբի երեք սեփականատերերը կալանավորված են: Նրանք խոստովանել են, որ չեն ստացել հրատեխնիկայի օգտագործմամբ շոուի կազմակերպման թույլտվություն:

Բուխարեստում երթ է անցկացվել հրդեհի հետևանքով զոհվածների հիշատակին և բողոքի ակցիա իշխանական կառույցներում կոռուպցիայի դեմ, ինչն էլ, բողոքավորների կարծիքով՝ հանգեցրել է ողբերգության:

Ռումինիայի վարչապետ Վիկտոր Պոնտան բողոքների ֆոնին հայտարարել է իր պաշտոնաթողության մասին: