Բեյրութում իրականացված պայթյունների զոհերի թիվը հասել է 43-ի

Բեյրութում իրականացված երկու պայթյունների հետևանքով զոհվածների թիվը հասել է 43-ի, վիրավորվել է ավելի քան 200 մարդ: Այդ մասին, ինչպես տեղեկացնում է «Արմենպրես»-ը, հաղորդել է BBC-ն՝ հղում անելով լիբանանյան ոստիկանության ներկայացուցիչներին:

Պայթյունները որոտացել են Լիբանանի մայրաքաղաքի հարավային շրջաններից մեկի բանուկ փողոցում, որտեղ բնակվում են առավելապես շիա մուսուլմաններ:

Պայթյուններն իրականացրել են մահապարտները: Լիբանանի ներքին գործերի նախարար Նուհադ Մաշնուկի խոսքով՝ նրանք շահիդների գոտիներով Էին:

Հաղորդվում է, որ զոհվածների մեջ գտնվել է ևս մեկ մահապարտի մարմին, որը զոհվել է երկրորդ պայթյունից՝ չհասցնելով գործի դնել պայթուցիկ սարքը:

Պայթյունների պատասխանատվությունն ստանձնել է «Իսլամական պետություն» ծայրահեղական խմբավորումը, որը կռվում է Սիրիայում և Իրաքում և, ըստ առկա տվյալների, առանձին մասնաճյուղ չունի Լիբանանում:

Շրջանը, որտեղ որոտացել են պայթյունները, վերահսկվում է «Հզբոլլահ» շարժման ներկայացուցիչների կողմից, որի զինյալներն ակտիվորեն մասնակցում են Սիրիայի հակամարտությանը նախագահ Բաշար Ասադի կողմից: