Մեծ Բրիտանիայի հետ բանակցությունները շատ դժվարին են լինելու. Տուսկ

Եվրախորհրդի ղեկավար Դոնալդ Տուսկը հայտարարել Է, որ Եվրամիությանը Մեծ Բրիտանիայի անդամակցության շուրջ վարչապետ Դեւիդ Քեմերոնի հետ բանակցությունները շատ դժվարին են լինելու, տեղեկացնում Է «Արմենպրես»-ը՝ հղում անելով BBC-ին:

«Մեծ Բրիտանիայի կողմից առաջադրվող պայմանները բավականին կոշտ են եւ, ցանկանում եմ ընդգծել, որ այդ հարցի շուրջ որոշման մշակումը շատ դժվարին Է լինելու»,- ասել Է Տուսկը՝ մեկնաբանելով ԵՄ-ին Մեծ Բրիտանիայի անդամակցության պայմանների վերաբերյալ Քեմերոնից ստացված նամակը:

Այդ հարցի շուրջ բանակցությունները պետք Է կայանան հաջորդ շաբաթ:

Ավելի վաղ Քեմերոնն սպառնացել Է երկիրը դուրս բերել Եվրամիությունից այն դեպքում, եթե ԵՄ-ի մնացած երկրների ղեկավարները չանսան միությունը բարեփոխելու եւ ազգային կառավարություններին ու խորհրդարաններին ավելի մեծ լիազորություններ տրամադրելու պահանջներին:

Մասնավորապես, նա առանձնացրել Է չորս գլխավոր կետ, որոնց շուրջ բանակցություններ են անցկացվելու: Դրանք են՝ Միացյալ Թագավարության ներքին շուկայի պաշտպանությունը, ինչպես որ դա արվում Է եվրոգոտու մեջ չմտնող մյուս երկրների շուկաների դեպքում, մրցունակության բարձրացումը, ԵՄ-ի հետ ավելի սերտ ինտեգրացումից Մեծ Բրիտանիային ազատելը, ազգային խորհրդարաններին ավելի լայն լիազորությունների տրամադրումը, նպաստներից եւ հարկային արտոնություններից ԵՄ-ի երկրներից միգրանտների օգտվելու սահմանափակումը:

Վերլուծաբաններն այն կարծիքին են, որ վերջին կետն ամենաբարդը կլինի բանակցություններում:

Մինչեւ 2017 թվականի վերջը Մեծ Բրիտանիայում պետք Է հանրաքվե անցկացվի ԵՄ-ին երկրի հետագա անդամակցության հարցի շուրջ: Դա այս տարվա մայիսին կայացած համընդհանուր ընտրություններում պահպանողականների ծրագրի խոստումներից մեկն Էր: