Մեծ Բրիտանիան բանակը կվերակառուցի ահաբեկչական սպառնալիքին համապատասխան

Բրիտանական բանակում արագ ծավալման երկու հարվածային բրիգադ կկազմավորվի ահաբեկիչների և երկրի այլ սպառնալիքների դեմ պայքարելու համար: Այդ մասին, ինչպես տեղեկացնում է «Արմենպրես»-ը, նոյեմբերի 23-ին գրում է The Telegraph-ը:

Բացի այդ, առաջիկա տասը տարվա ընթացքում բրիտանական բանակն իր տրամադրության տակ կունենա 178 մլրդ ֆունտի հասնող ռազմական բյուջե: Այդ փողերով պլանավորվում է գնել «Թայֆուն» մարտական ինքնաթիռներ, ևս 39 ինքնաթիռ՝ «Սթելս» համակարգով: Միջոցները կօգտագործվեն նաև ինը ժամանակակից սուզանավերի ձեռքբերման և ռազմական կիրառման «նոր սերնդի անօդաչուների» ստեղծման համար:

Հատուկ ուժերը պահելու ամենամյա ծախսերը կաճեն 2 մլրդ ֆունտով, ճշտում է թերթը:

«Օգտագործելով մեր տնտեսական հզորությունը՝ մենք այդ միջոցները կօգտագործենք ահաբեկչական սպառնալիքը հաղթահարելու համար»,- թերթում հրապարակված իր հոդվածում հայտարարել է Մեծ Բրիտանիայի վարչապետ Դևիդ Քեմերոնը:

Նոյեմբերի 22-ին հաղորդվել էր, որ Մեծ Բրիտանիան 138 անտեսանելի կործանիչներ կգնի «Իսլամական պետությանը» հարվածներ հասցնելու համար: Ինչպես նշում են փորձագետները, ինքնաթիռների գնումը Մեծ Բրիտանիային ռազմական ուժով երկրորդը կդարձնի ԱՄՆ-ից հետո: