Արգենտինա. իշխող կուսակցության թեկնածուն ընդունեց իր պարտությունը

Արգենտինայի իշխող կուսակցության ներկայացուցիչ և Բուենոս Այրեսի նահանգի նահանգապետ Դանիել Սցիոլին ընդունել է պարտությունը երկրում կայացած նախագահական ընտրություններում, տեղեկացնում է «Արմենպրես»-ը՝ հղում անելով BBC-ին:

Նախնական արդյունքներով՝ նրա մրցակիցը՝ «Վերափոխումներ» կուսակցությունից աջ կենտրոնամետ թեկնածու Մաուրիսիո Մակրին, հավաքել է ձայների 52,1 տոկոսը: Սցիոլին նրան զիջում է 47,9 տոկոս արդյունքով:

Սցիոլին հայտարարել է, որ Մակրին ընտրվել է «ժողովրդի կամքով»: Նա հայտնել է, որ զանգահարել է հաղթողին՝ շնորհավորելու նրան և «հաջողություններ մաղթելու՝ հանուն մեր երկրի բարօրության»:

Իր հերթին Մակրին հայտարարել է, որ «սա պատմական օր է, նոր դարաշրջանի սկիզբ, որը զարմանալի է լինելու»:

Այսպիսով, Արգենտինայում վերջ դրվեց «Ճակատ հանուն հաղթանակի» կուսակցության կառավարման 12-ամյա շրջանին:

Դիտորդների կարծիքով՝ Մակրիի՝ «Բոկա խունիորս» ֆուտբոլային ակումբի նախկին նախագահի հաջողությունը պայմանավորված է Արգենտինայի իշխող կուսակցության տնտեսական քաղաքականությունից բնակչության դժգոհությամբ:

Արգենտինայի տնտեսությունը, որը չափերով երրորդն է Լատինական Ամերիկայում, ներկայումս լճացում է ապրում, գնաճը կազմում է մոտավորապես 30 տոկոս, երկրում ծաղկում է կոռուպցիան: Բացի այդ, Արգենտինայի իշխանությունները մինչ այժմ չեն կարգավորել դատավեճն ամերիկացի մի խումբ վարկատուների հետ, որը վերաբերում է 2001 թվականի դեֆոլտից հետո երկրի պարտքի վերաձևակերպմանը: