Օլանդը և Քեմերոնը ծաղիկներ են դրել «Բատակլան» թատրոնում
Աշխարհ
Ֆրանսիայի նախագահ Ֆրանսուա Օլանդը, Մեծ Բրիտանիայի վարչապետ Դևիդ Քեմերոնը և Փարիզի քաղաքագլուխ Անն Իդալգոն նոյեմբերի 23-ի առավոտյան եկել են Փարիզի «Բատակլան» թատրոն, որտեղ նոյեմբերի 13-ին ահաբեկիչները սպանդ էին սարքել, և ծաղիկներ են դրել ի հիշատակ ահաբեկչական գրոհի զոհերի, տեղեկացնում է «Արմենպրես»-ը:
«Նախագահ Օլանդն ու ես ուս-ուսի էինք կանգնած Փարիզի «Բատակլան»-ի մոտ»,- գրել է Քեմերոնը Twitter միկրոբլոգների ցանցի իր հաշվում: Նա նաև զետեղել է լուսանկար:
«Բատակլան» այցելությունից հետո Օլանդը և Քեմերոնը ուղևորվել են Ելիսեյան պալատ, որտեղ ներկայում բանակցություններ են վարում Սիրիայի իրադրության և Սիրիայում ու Իրաքում «Իսլամական պետություն» արմատական իսլամիստական խմբավորման դեմ պայքարի միջոցների շուրջ:
Նոյեմբերի 13-ի երեկոյան Փարիզում տեղի են ունեցել մի շարք ահաբեկչական գործողություններ: Անհայտ անձինք կրակ են բացել ռեստորաններից մեկում, երեք պայթյուն է որոտացել «Ստադ դե Ֆրանս» մարզադաշտի անմիջական մերձակայքում, որտեղ ընթանում էր Ֆրանսիայի և Գերմանիայի ֆուտբոլի հավաքականների ընկերական մրցախաղը, որին ներկա էր Ֆրանսիայի նախագահ Ֆրանսուա Օլանդը: Բացի այդ, անհայտ անձինք սպանդ են սարքել «Բատակլան» թատրոնում ռոք-համերգի ժամանակ: Ըստ վերջին տվյալների՝ զոհվել է 130 մարդ, հաղորդել է ՌԻԱ Նովոստին:
ՈՒՂԻՂ ԵԹԵՐ
Ամենադիտված 
Այսօր մեր ընտանիքին բաժին հասավ ամենածանր կորուստը
