Պուտինը և Ռոուհանին պայմանավորվել են ամրապնդել գործակցությունը Սիրիայի խնդրում

Ռուսաստանը և Իրանը կշարունակեն համակարգել գործողություններն ահաբեկչության դեմ մղվող պայքարում և մտադիր են ամրապնդել գործակցությունը Սիրիայի հակամարտության կարգավորման հարցում: Այդ մասին հայտարարել է ՌԴ նախագահ Վլադիմիր Պուտինը, տեղեկացնում է «Արմենպրես»-ը՝ հղում անելով ՌԻԱ Նովոստիին:

«Իրանի հետ շարունակելու ենք կոորդինացումը ահաբեկչության դեմ մղվող պայքարում: Ամրապնդելու ենք մեր փոխգործակցությունը Սիրիայի խնդրով միջազգային խմբի շրջանակներում, այդ թվում՝ համապարփակ միջսիրիական քաղաքական գործընթացի գործարկման վերաբերյալ որոշումների իրագործման նպատակով»,- ասել է Պուտինը՝ ամփոփելով Իրանի նախագահ Հասան Ռոուհանիի հետ նոյեմբերի 23-ին Թեհրանում կայացած հանդիպման արդյունքները:

Ինչպես նշում է ՏԱՍՍ-ը, նույն օրն ավելի վաղ Իրանի ղեկավար և հոգևոր առաջնորդ այաթոլլա Ալի Խամենեին Պուտինի հետ հանդիպմանը բարձր է գնահատել Ռուսաստանի դերը տարածաշրջանային հարցերի լուծման մեջ:

«Այաթոլլա Խամենեին ողջունեց երկկողմ, տարածաշրջանային և միջազգային մակարդակներով համագործակցության հետագա ընդլայնումը»,- ասված է Իրանի ղեկավարի մամուլի ծառայության հաղորդագրության մեջ: Դրանում նշվում է, որ Խամենեին գնահատել է Մոսկվայի այն դերն ու ազդեցությունը, որը նա գործում է տարածաշրջանային խնդիրների, մասնավորապես սիրիական ճգնաժամի լուծման վրա: