Ղրիմում առանց էլեկտրականության է մնում շուրջ 1 մլն մարդ

Նոյեմբերի 24-ի առավոտվա տվյալներով՝ Ղրիմում առանց էլեկտրականության է մնում շուրջ 1 մլն մարդ: Այդ մասին, ինչպես տեղեկացնում է «Արմենպրես»-ը, հաղորդել է Ռուսաստանի էներգետիկայի նախարարությունը: Գերատեսչության վերլուծական կենտրոնի հաշվետվության մեջ ասված է, որ էլեկտրաէներգիայից զրկված է 935 հազար մարդ, որոնցից 270 հազարը Սևաստոպոլի բնակիչներ են:

Թերակղզու ենթակառուցվածքի օբյեկտների մի մասն աշխատում է պահեստային հզորություններով: Ղրիմի բնակիչների կողմից օգտագործվող էլեկտրաէներգիայի մեծ մասն արտադրվում է Սևաստոպոլի և Սիմֆերոպոլի ջերմաէլեկտրակայաններում:

Ղրիմում էներգասպառման լիմիտներ են սահմանված: Թերակղզում միագումար սպառումը փորձում են պահպանել 300 մեգավատի մակարդակում այն դեպքում, երբ Ղրիմի սեփական հզորությունները 360 մեգավատ էլեկտրաէներգիա են թողարկում:

Մեկ օր առաջ Ղրիմի՝ առանց էլեկտրականության մնացած բնակիչների թիվը ՌԴ էներգետիկայի նախարարությունը գնահատում էր 1,5 միլիոն:

Նոյեմբերի 20-ի առավոտյան անհայտ անձանց կողմից պայթեցվել ու գնդակոծվել են դեպի Ղրիմ ձգվող ուկրաինական էլեկտրահաղորդման չորս գծերից երկուսի մի քանի հենասյուներ: Նույն օրն ավելի ուշ շարքից հանվել են էլեկտրահաղորդման մնացած երկու գծերը, ինչը էներգետիկական ճգնաժամ է առաջացրել թերակղզում:

Ակտիվիստները արգելափակել են դեպի վնասված հենասյուներ տանող ճանապարհը՝ կազմակերպելով Ղրիմի շրջափակում՝ ի նշան Ռուսաստանին դրա միացման դեմ բողոքի:

Էլեկտրաէներգիայի անջատման կապակցությամբ Ղրիմում արտակարգ դրության ռեժիմ է սահմանվել: