Ադրբեջանի նավթային հիմնադրամը 2016 թվականին 1,55 մլրդ մանաթ պակասորդ կունենա

Աշխարհ 26 Նոյեմբեր, 2015 17:23

Ադրբեջանի պետական նավթային հիմնադրամի եկամուտները 2016 թվականին, 2015 թվականի համեմատ, կանխատեսվում են 34,5 տոկոսով կամ 3,53 մլրդ մանաթով պակաս:

Նման կանխատեսմամբ, ինչպես հաղորդում է «Արմենպրես»-ը' վկայակոչելով «Թուրան» լրատվական գործակալությունը, հանդես է եկել հիմնադրամն' ինքը:

Նախագծի համաձայն, որը Հիմնադրամի դիտորդական խորհրդի կողմից հաստատվելուց հետո արդեն ուղարկվել է Ադրբեջանի ղեկավարի ստորագրությանը, 2016 թվականին Հիմնադրամի ծախսերը, 2015 թվականին սպասված ծավալի համեմատ, ծրագրված են 33,4 տոկոսով կամ 4,1 մլրդ մանաթով պակաս:

«Թուրան»-ի տվյալներով' Հիմնադրամի 2016 թվականի պակասորդը ծրագրված է 1,549 մլրդ մանաթ: Ընթացիկ տարում Հիմնադրամի դեֆիցիտը սպասվում է մոտ 1,1 մլրդ մանաթ մակարդակի:

Ադրբեջանի պետական նավթային հիմնադրամից պետբյուջե փոխանցումները 2016 թվականին սպասվում է 6 մլրդ մանաթ, ինչը 42,2 տոկոսով կամ 4,388 մլրդ մանաթով փոքր է' 2015 թվականի համեմատ:

Ընթացիկ տարվա հոկտեմբերի 1-ի դրությամբ Ադրբեջանի պետական նավթային հիմնադրամի ակտիվները, որոնք տարվա սկզբի համեմատ 6,38 տոկոսով կամ 37,1 մլրդ դոլարով կրճատվել են, կազմել են 34,74 մլրդ դոլար:

«Ազադլըգ» թերթը, հղում կատարելով Ադրբեջանի պետական մաքսային ծառայության զեկույցին հայտնել է, որ անցյալ տարվանից սկսած նավթի էժանացման արդյունքում Ադրբեջանի նավթային եկամուտները 8,7 մլրդ դոլարով նվազել են: Նավթի համաշխարհային գների և մանաթի փոխարժեքի անկման պատճառով Ադրբեջանի տնտեսությունը հայտնվել է ճգնաժամի մեջ. փակվել են նավթարդյունաբերության մի շարք ձեռնարկություններ, պետական և մասնավոր հաստատություներ, հազարավոր աշխատավորներ գործազուրկ են դարձել, Ադրբեջանի տնտեսական աճն օրեցօր նվազում է, միջազգային վարկանիշային գործակալությունների համաձայն' ադրբեջանական բանկերը կանգնած են ռիսկի սահմանին, այս տարվա ընթացքում Ադրբեջանն արդեն 6,7 մլրդ դոլար է կորցրել, երկրի բյուջեն դեֆիցիտային է դարձել. եկող տարվա բյուջեն անցյալ տարվա պետբյուջեից մոտ 2 անգամ փոքր է սահմանվել:

Report.az լրատվական կայքն ավելի վաղ հայտնել էր, որ 2015 թվականի սկզբի համեմատ Ադրբեջանի կենտրոնական բանկի արտարժույթի պահուստը կրճատվել է 54,5 տոկոսով կամ 8199 մլն դոլարով՝ նշելով, որ միայն հոկտեմբերին ԿԲ-ի արտարժույթի պահուստը 180,1 մլն դոլարով նվազել է: Տարվա սկզբի համեմատ կրճատումը կազմել է 48,8 տոկոս:

Ադրբեջանի պետական նավթային հիմնադրամի եկամուտների և ԿԲ-ի արտարժույթի պահուստի արագորեն նվազումը պայմանավորված է նավթի համաշխարհային գների շարունակական անկմամբ:

Ադրբեջանի արտահանման 95 տոկոսը կազմում են գազը, նավթն ու նավթամթերքները, իսկ երկրի պետբյուջեն 75 տոկոսով ձևավորվում է էներգակիրների արտահանումից ստացվող եկամուտների հաշվին:

Ադրբեջանի 1915 թվականի պետբյուջեում նավթի գինը մեկ բարելի համար նախատեսված է 90 դոլար: Ներկայումս այն արդեն պետբյուջեում նախատեսվածից մոտ 42 դոլարով ցածր է: