Պեկինը և Դամասկոսը երեք սկզբունք են մշակել Սիրիայի խաղաղ գործընթացի համար

Չինաստանը 40 մլն յուանի (գրեթե 6,2 մլն դոլար) չափով մարդասիրական օգնություն կհատկացնի Սիրիայի կառավարությանը: Այդ մասին, ինչպես տեղեկացնում է «Արմենպրես»-ը, դեկտեմբերի 24-ին հայտարարել է ՉԺՀ-ի արտաքին գործերի նախարար Վան Ին՝ ամփոփելով Սիրիայի Նախարարների խորհրդի փոխնախագահ և արտաքին գործերի նախարար Վալիդ Մուալեմի հետ կայացած բանակցությունների արդյունքները:

Վան Ին նաև հավելել է, որ Սիրիայի կառավարությունը պատրաստ է քննարկել առանձին տարածաշրջաններում հրադադարի ռեժիմի հաստատման հնարավորությունը՝ ընդդիմության ներկայացուցիչների հետ խաղաղ գործընթացի զարգացման համար:

Մուալեմն իր հերթին հայտարարել է, որ Սիրիայի կառավարությունն սպասում է ընդդիմության այն ներկայացուցիչների ցուցակին, ովքեր մասնակցելու են Ժնևի բանակցություններին:

Չինաստանը և Սիրիան երեք սկզբունք են մշակել կառավարության և ընդդիմության միջև խաղաղ գործընթացի համար:

«Ամենակարևոր պայմանավորվածությունը, որին մենք հասանք, դարձավ այն, որ Սիրիայի ճգնաժամը լուծելիս մենք պետք է հետևենք երեք սկզբունքի»,- ասել է Վան Ին: «Առաջին՝ մենք պետք է պահպանենք ճգնաժամի քաղաքական կարգավորման ուղղվածությունը: Երկրորդ՝ Սիրիայի ապագան պետք է վճռվի երկրի ժողովրդի կողմից: Երրորդ՝ ՄԱԿ-ը պետք է առաջատար դեր խաղա կողմերի միջև միջնորդության հարցում»,- նշել է ՉԺՀ-ի ԱԳ նախարարը:

Վալիդ Մուալեմը չինական կողմի հրավերով դեկտեմբերի 23-ին ՉԺՀ է ժամանել եռօրյա այցով: Ինչպես հայտնել են չինական դիվանագիտական աղբյուրներ, Պեկինը նաև մտադիր է մոտ ժամանակներս կազմակերպել սիրիական ընդդիմության ներկայացուցիչների այցը ՉԺՀ, հաղորդել է ՏԱՍՍ-ը: