Ադրբեջանում անցնում են խիստ խնայողության. 2016 թվականի պետբյուջեն կվերանայվի

Էներգակիրների արտահանման վրա հիմնված տնտեսություն ունեցող և նավթի համաշխարհային գների շարունակական անկման հետևանքով տնտեսական ճգնաժամում հայտնված Ադրբեջանում պատրաստվում են փոփոխություն մտցնել 2016 թվականի համար հաստատված բյուջեում, անցնել 4 տարվա տնտեսման ռեժիմի, նվազեցնել պետական ներդրումները, լուրջ բարեփոխումներ կատարել պետական կառավարման համակարգում և արագացնել պետական ունեցվածքի մասնավորեցման գործընթացը:

Ինչպես հաղորդում է «Արմենպրես»-ը՝ վկայակոչելով «Ազադլըգ» թերթը, այս մասին Ադրբեջանի նախագահ Իլհամ Ալիևի նախագահությամբ երեկ տեղի ունեցած կառավարության նիստում հայտնել է ֆինանսների նախարար Սամիր Շարիֆովը:

Շարիֆովը հայտնել է, որ չնայած 2016 թվականի պետական բյուջեում, որը հաստատվել է անցյալ տարվա դեկտեմբերին, բյուջեի ծախսերը 3,1 մլրդ մանաթով կամ 15 տոկոսով արդեն կրճատվել են՝ կապված նավթի գների անկման հետ, անհրաժեշտություն կա բյուջեն վերանայել այլ հոդվածներով ևս:

Ադրբեջանի արտահանման 95 տոկոսը կազմում են գազը, նավթն ու նավթամթերքները, իսկ երկրի պետբյուջեն 75 տոկոսով ձևավորվում է էներգակիրների արտահանումից ստացվող եկամուտների հաշվին:

Ադրբեջանի 2016 թվականի պետբյուջեում նավթի գինը մեկ բարելի համար նախատեսված է 50 դոլար: Ներկայում այն արդեն պետբյուջեում նախատեսվածից մոտ 18 դոլարով ցածր է:

Ադրբեջանի ազգային արժույթը' մանաթը վերջին մեկ տարում արդեն երկու անգամ արժեզրկվել է: Ներկայումս Բաքվի «սև շուկայում» ամերիկյան մեկ դոլարը գնվում է 2 մանաթով: