«Գազպրոմ»-ը Վրաստանին ավելի էժան գազ է առաջարկում, քան SOCAR-ը. փոխվարչապետ

Ռուսաստանյան «Գազպրոմ»-ը Վրաստանին ավելի էժան բնական գազ է առաջարկում, քան Ադրբեջանի պետական նավթային ընկերությունը' SOCAR-ը:

Այս մասին, ինչպես հաղորդում է «Արմենպրես»-ը' վկայակոչելով «Գրուզիա օնլայն»-ը, հայտարարել է Վրաստանի առաջին փոխվարչապետ, էներգետիկայի նախարար Կախա Կալաձեն:

Նրա խոսքով' այդ գազը գնելու դեպքում Վրաստանը կհավասարակշռի պակասորդը, որը չի կարողանում լրացնել SOCAR-ի հաշվին:

«Չեմ նշի թվերը, բայց կարող եմ ասել, որ առաջարկվող ռուսաստանյան գազի գինը ցածր է այսօր Ադրբեջանի հետ մեր ունեցածից: Այդ գները բավականին մրցունակ են, և մենք դա ներկայացրել ենք SOCAR-ին: Նրանց բացարձակ բաց կերպով ասել ենք, թե ինչպիսի առաջարկներ ունենք»,- ասել է Կալաձեն:

Նրա խոսքով՝ SOCAR-ը չի կարող ամբողջությամբ բավարարել Վրաստանի գազի պահանջարկը, որի պատճառները խողովակների թողունակությունը և բնական գազի սպառման սեզոնայնություն են:

«2014 թվականի համեմատ 2015 թվականին Վրաստանի գազի սպառման ծավալը 19 տոկոսով աճել է: Ադրբեջանական խողովակով SOCAR-ից մենք ստանում ենք 6 մլն խմ գազ, «Շահդենիզ»-ից' 2,9 մլն խմ և 2,5 մլն խմ, այսինքն' 10 տոկոս Ռուսաստանից' տարանցման դիմաց: Դրանից ավելի գազ SOCAR-ի խողովակաշարից մենք չենք ստանում, քանի որ Ղազախից եկող խողովակը 6 մլն խմ գազից ավելի թողունակություն չունի»,- ասել է Վրաստանի փոխվարչապետը:

Ադրբեջանում դժգոհությամբ են ընդունել լուրերն այն մասին, որ Վրաստանը ցանկանում է դիվերսիֆիկացնել մատակարարվող գազի ծավալները, ինչի համար բանակցություններ է վարում Ռուսաստանի և Իրանի հետ: