Այլևս մի տվեք հարցազրույցներ ադրբեջանական կայքերին, այն էլ այդպիսի «ռոմանտիկ» բովանդակությամբ

Երկրում առկա խնդիրներով մտահոգ լինելն ու այդ մասին բարձրաձայնելը ոմանք ակնհայտորեն սկսել են խառնել տեղեկատվական պատերազմում թշնամուն միավորներ պարգևելու հետ: Մանավանդ վերջին շրջանում «մոդա» է դառնում ադրբեջանական լրատվամիջոցներին հարցազրույց տալը և այդ հարցազրույցներում Հայաստանից բողոքելը: Բայց միայն բողոքելով չեն սահմանափակվում նշված անձինք, նրանք զուգահեռ ձգտում են նաև շահել ադրբեջանցի ընթերցողների համակրանքը, համենայն դեպս իրենց տված հարցազրույցներից ես այդ տպավորությունն եմ ստանում: Նաև տպավորություն եմ ստանում, որ այդ մարդիկ կարծես թե ուշադրության պակաս ունեն…

Չգիտեմ՝ Haqqin.az-ին ու նմանատիպ az-երին հարցազրույց տվողներն ու նման պլաններ ունեցողները գիտակցու՞մ են արդյոք, որ իրենց՝ ռոմանտիկայով լեցուն ու նոստալգիկ մտքերն ադրբեջանական կայքերը հաճույքով հրապարակում են այնպիսի վերնագրերով, որոնցից բխում է, թե իբրև հայերի համար Բաքվում ավելի լավ է, քան «մեկուսացված» վիճակում, որ պատերազմը մեր ու Ադրբեջանի միջև ընթանում է նաև տեղեկատվական հարթակում, և նման հարցազրույցներով նրանք ուղղակի միավորներ են պարգևում մեր թշնամիներին:

Ուզում եմ առաջարկել Haqqin.az-ին հարցազրույց տալու սիրահարներին. եթե դուք խիստ կարիք ունեք հարցազրույցներ տալու և որ մարդիկ լսեն ձեզ, կարող եք գրել կամ զանգահարել ինձ, և ես ձեզ կհրավիրեմ հարցազրույցի ԼՈՒՐԵՐ.com-ում, որի լսարանն իր քանակով, համոզված եմ՝ չի զիջում Haqqin.az-ի լսարանին: Կարող եմ հարցազրույցներ կազմակերպել նաև հաճախակի, բայց մի պայմանով՝ այլևս մի տվեք հարցազրույցներ ադրբեջանական կայքերին, այն էլ այդպիսի «ռոմանտիկ» բովանդակությամբ:

Կարեն Վարդանյան