Համազգային թալանի մեխանիկան…

Համաձայնե՛ք, որ մեզանում քչերը կգտնվեն, որոնք երբևէ բախված չլինեն ՀԷՑ համապատասխան աշխատակիցների կողմից թույլ տրվող հոսանքի հավելագրումների խնդրին: Չնայած այժմ դժվար կարելի է պնդել այն, որ դրանք կրում են համատարած ու տոտալ բնույթ, սակայն համարել, որ անցյալում լայն տարածում ունեցող այս արատավոր երևույթը լիովին հաղթահարվել է, սխալ կլիներ: Ասում են՝ նմանատիպ հավելագրումները հատկապես տարածված են քաղաքամայր Երևանի բազմաբնակարան շենքերում, ուր, այսպես կոչված, էլեկտրիկները, օրվա երեկոյան ու գիշերային ժամերին իրենց «սև գործն» են անում. բնակչության վզին փաթաթում են հավելյալ ֆինանսական բեռ՝ նրանց կողմից չօգտագործած էլեկտրաէներգիայի համար:

Խնդիրն այս հատկապես սրվել է վերջին ժամանակներում, ինչը վկայում է այն մասին, որ ՀԷՑ սեփականատիրոջ փոփոխությունը գրեթե ոչ մի էական բարեփոխման չի հանգեցրել բնագավառում. ինչպես «ուտում» էին, այնպես էլ շարունակում են «ուտել»… Ավելին՝ սույն խնդիրն այնքան է սրվել, որ հատկապես վերջին շրջանում վերածվել է հայկական մի շարք ԶԼՄ-ներում քննարկվող հիմնական թեմաներից մեկի: Բացի այս՝ մի շարք հասարակական կազմակերպություններ իրենց սեփական հետաքննությունն են անցկացրել այս ուղղությամբ և պարզել որոշ հանգամանքներ, որոնք կարող են հետաքրքրել շատերին: Նրանցից մի քանիսի պնդմամբ, օրինակ, Երևանի բոլոր վարչական շրջաններում ՀԷՑ-ի հաշվիչների մոտ 70-80%-ը գործում է ի վնաս քաղաքացիների: Ասում են՝ այդ հավելագրումներն արվում են հիմնականում ի հաշիվ գիշերային ժամերի: Ուշագրավ է այն, որ ՀԷՑ-ը ևս չի ժխտում այն, որ գիշերային ժամերի խնդիրն առկա է համակարգում՝ խոստանալով, սակայն, կարգավորել այս հարցն ամենասեղմ ժամկետում:

Այն փաստը, որ մեր հասարակությունում շատ քիչ են այն շերտերը, որոնք աչքի են ընկնում իրենց բարեկեցությամբ, նորություն չէ. դրանք հիմնականում պետական պաշտոնյաներ են, գործարարներ, երբեմն էլ՝ արտերկրից տրանսվերտներ ստացողներ: Բայց երբ ուսումնասիրում ես որոշ «էլեկտրիկների» կենսակերպը, նրանց վարած մեքենաները, հասկանում ես, որ սույն կարծիքն իրականում թյուր է. «էլեկտրիկները» ևս մեր հասարակության արտոնյալ շերտերից են ու առանձնապես չեն նեղվում իրենց սոցիալական վիճակից:

Հաշվի առնելով նրանց աշխատավարձերի ոչ բարձր լինելը՝ միանգամից գալիս ես այն եզրահանգման, որ նրանք բարեկեցության նման աստիճանի կարող էին հասնել բացառապես զարտուղի ճանապարհներով՝ մասնավորապես՝ նույն հավելագրումներ կատարելով. մենք աշխատում ենք, իրենք՝ ուտում, սրանից պարզ հարստանալու բանաձև մարդկությունը պարզապես չէր կարող հորինել… Պարզ է, չէ՞, որ թալանում են բնավ ոչ միայնակ, հակառակ պարագայում՝ կա՛մ կդատվեին, կա՛մ, ամենաքիչը, կզրկվեին աշխատանքից: Իսկ սա էլ, իր հերթին, նշանակում է, որ իրականում ողջ համակարգն է թաթախված կոռուպցիայի ու կաշառակերության մեջ, և հարկավոր է խնդիրը լուծել վերևներում, այլ ոչ թե սկսել ներքևներից:

Հաշվի առնելով ՀԷՑ-ի վարքը՝ կապված առկա խնդիրը չժխտելու հետ, հույս ունենք, որ հնարավորինս կարճ ժամանակահատվածում նոր ղեկավարությանը կհաջողվի էապես կրճատել կոռուպցիայի մակարդակն ու բնակիչ-ՀԷՑ հարաբերությունները բարձրացնել առավել քաղաքակիրթ մակարդակի:

 Դավիթ Բաբանով