4 ամիս՝ փաստացի գործազուրկ…
Վերլուծական
Վերջին ժամանակներս հարևան ու բարեկամ Ռուսաստանում մեծ աղմուկ են հանել որոշ պարենային ու ոչ պարենային ապրանքատեսակների շուկաներում հայտնաբերած խախտումները. բանից պարզվում է, որ ՌԴ սպառողական շուկայում անցկացնելով համապատասխան ուսումնասիրություններ՝ այս երկրի համապատասխան գերատեսչությունը՝ «Ռոսկոնտրոլը», հրապարակել է համապատասխան ցանկ, ուր ներառված են բավական մեծ թվով ապրանքներ, ապրանքներ, որոնք արտահանվում են նաև Հայաստան: Այս ապրանքների թվում առկա են այնպիսիք, որոնք հայ սպառողն ակտիվորեն օգտագործում է նաև իր կենցաղում՝ մաքրող և լվացող միջոցներ, կոսմետիկա, ինչպես նաև կաթնամթերք ու մսամթերք, գազավորված խմիչքներ:
Բայց մինչ Ռուսաստանում զբաղված են սեփական քաղաքացիների առողջությանը սպառնացող խնդիրների հայտնաբերմամբ ու լուծմամբ, պարզվում է՝ Հայաստանում գործող նույնատիպ կառույցը՝ Էկոնոմիկայի նախարարության շուկայի վերահսկողության պետական տեսչությունը, մոտ 4 ամիս է, ինչ, չգիտես ինչ պատճառներով, չի գործում: Համաձայնե՛ք, որ 4 ամիսը բավական պատկառելի ժամանակահատված է, և այդ ընթացքում ինչ ասես, որ չէր կարող պատահել. է՛լ զանգվածային թունավորումներ, է՛լ մահվան դեպքեր…
Թե հատկապես ինչն է Կարեն Ճշմարիտյանի ենթակայության տակ գտնվող պետական մարմնի անգործության կոնկրետ պատճառը, այդպես էլ մնում է անհասկանալի: Հիմա եթե հանկարծ պարզվի, որ այս կամ այն սուպերմարկետում վաճառում են Ռուսաստանից ներկրած վատօրակ կամ անպիտան սննդամթերք, որի պատճառով տուժողներ են եղել, ո՞վ է դրա համար պատասխան տալու: Ինչպե՞ս է Կարեն Ճշմարիտյանը լրագրողների բազմության առաջ իր ավանդական քմծիծաղով փորձելու հօդս ցնդեցնել այն օբյեկտիվ մեղադրանքները, որ կարող են հնչել իր ու իր կողմից վերահսկվող նախարարության հասցեին: Չնայած՝ ո՞վ չգիտի մեր իրականության մասին. ո՞վ է այսքան ժամանակ մեր երկրում իրական պատասխանատվության ենթարկվել իր չարածի համար, կարո՞ղ եք մատնացույց անել:
Ազնիվ լինելու համար, սակայն, պետք է ասենք, որ նման թափթփվածությունը բնորոշ է ոչ միայն էկոնոմիկայի նախարարությանը, այլև շատ ու շատ պետական մարմիններին: Մեր երկիրը այսօր, խոշոր հաշվով, ունի պետական ճիշտ մենեջմենթի խնդիր, որի բացակայության հետևանքով է նաև, որ հաճախ ստիպված ենք լինում բախվել այնպիսի խնդիրների, որոնք պետք է բացառվեին մեր իրականությունից ի սկզբանե. ավաղ…
Դավիթ Բաբանով
ՈՒՂԻՂ ԵԹԵՐ
Ամենադիտված 
Դիրքում բռնшբшրnւթյшն դեպքը տեսած, ապա սպшնված 3 զինվորների ծնողներն արդարադատություն են պահանջում (տեսանյութ)
