Հայուհի, ով իր քանոնի նվագով հմայել է շատերին՝ Մարիաննա Գևորգյան (լուսանկար)

Մարիաննա Գևորգյանը Կոմիտասի անվան կամերային երաժշտության տան «Տաղարան» հնագույն երաժշտության համույթի մենակատար-քանոնահարուհին է. գեղարվեստական ղեկավար՝ Սեդրակ Երկանյան: Տաղանդաշատ քանոնահարուհի, ով իր անզուգական կատարումներով վայելում է ժողովրդական նվագարանների կատարողական արվեստի համակիրների սերն ու հարգանքը:

Հինգերորդ դարից մեզ հասած ավանդական այս նվագարանի՝ քանոնի մերօրյա ոսկե մեդալի, «Բեմական հմայք»-ի արժանացած համեստ երաժիշտն անթերի կերպով տիրապետում է գործիքի, թե՛ վիրտուոզ, թե՛ արտահայտչական հնարքներին և հանդես գալիս ժողովրդական ու դասական բարդ ստեղծագործությունների մաքրամաքուր կատարումներով:

Մարիաննան ուսանել է Երևանի Կոմիտասի անվան պետական կոնսերվատորիայում: Գերազանցության դիպլոմներով ավարտել հայրենի երաժշտանոցի մագիստրատուրան և ասպիրանտուրան:

Խորապես ինտելեկտուալ երաժիշտ-կատարող է, ով կարողանում է երաժշտության կախարդական հնչյուններն իր քանոնի նվագով փոխանցել հանդիսականին՝ դյութելով նրանց սրտերն ու հոգիները:

Մարիաննայի նվագից տաղանդի հուր է ժայթքում: Իր արվեստի նվիրյալ է, ում համար գերխնդիր է մեր ազգային ու ավանդական արժեքների պահպանումն ու փոխանցումն ապագա սերունդներին:

Քանոնահարուհին անընդհատ պրպտումների մեջ է, շատ բան է սովորել հմուտ վարպետներից և շարունակաբար վերցնում է իր բարձր արվեստի կատարելագործման համար անհրաժեշտը:

Տաղանդաշատ քանոնահարուհու համար երաժշտական կատարելության օրինակներ են Կոմիտաս վարդապետի ստեղծագործությունները և միջնադարյան տաղերը, նախընտրելի կոմպոզիտորն է Խաչատուր Ավետիսյանը:

Առաջնորդվում է իր անցած ստեղծագործական ուղու՝ բավական բարդ դասերով: Եղել են պահեր, երբ ծայրագույն հոգեկան խռովքի պահեր է ապրել համերգներին, անգամ՝ միջազգային մրցույթներին մասնակցելիս, բայց այդ ժամանակ էլ կարողացել է անթերի ու ներկայանալի բեմական կեցվածքով հավուր պատշաճի հանդես գալ:

Յուրաքանչյուր գործում հասունացում է պետք, հուզական աշխարհի հարստություն, մարդկային բարձր արժանիքներ, տարիների փորձով մշակված կուլտուրա, հոգու բարություն: Այս չափանիշների կրողն է մեր հայ քանոնահարուհին:

Հայուհու խնդրանքը բոլորին՝ աշխարհում ծնողական սերն անփոխարինելի է, գուրգուրեք և փայփայեք նրանց, գնահատեք՝ քանի դեռ ունեք…: