Խմբագրական. Ի՞նչ ակնկալել նոր նախարարներից

Եվ այսպես, ունեցանք 3 նոր նախարար, երեքն էլ՝ քաղաքական լուրջ ճանապարհ անցած մարդիկ, բայց թե ինչ կարելի է ակնկալել նրանցից՝ առայժմ դժվարանում եմ ասել, երևի թե ժամանակ է պետք: Չնայած Դավիթ Լոքյանի մասին վարչապետ Հովիկ Աբրահամյանն արդեն ասաց, ավելի շուտ՝ հիշեցրեց, որ ժամանակին նրա օրոք երկնիշ թվերով տնտեսական աճ էր արձանագրվում: Բայց եկեք չմոռանանք, որ դա Ռոբերտ Քոչարյանի օրոք էր, իսկ Քոչարյանի օրոք սիրում էին երկնիշ թվեր «նկարել», դա նույնիսկ գեղեցիկ էր նայվում, այլ հարց է, որ մարդիկ իրենց մաշկի վրա չէին զգում այդ երկնիշ թվերի զորությունը: Այնպես որ՝ նորանշանակ նախարարից այս անգամ մեզ ոչ թե նկարած թվեր են պետք, այլ՝ տեսանելի արդյունք:

Լևոն Մկրտչյանն առաջին անգամը չէ, որ զբաղեցնում է կրթության և գիտության նախարարի պաշտոնը: Արդեն հասցրել է դժգոհել ոլորտում առկա բյուրոկրատիզմից և խոստացել է, որ իր օրոք բյուրոկրատական բեռնաթափում կլինի: Մնում է, որ խոսքը զուտ խոսք չմնա, ինչպես հաճախ է լինում մեր երկրում: Մեկ էլ, վատ չէր լինի, եթե նորանշանակ ԿԳ նախարարը փոխեր իր նախորդի մի շարք անտրամաբանական որոշումները, ասենք՝ աստղագիտությունը և գծագրությունը դպրոցների ուսումնական ծրագրից որպես առանձին առարկա հանելու մասին:

Դե իսկ Արծվիկ Մինասյանից դեռ վաղ է ինչ-որ բան ակնկալելը, որովհետև նույնիսկ նրա նախորդից չհասցրեցինք ակնկալել: Ճշմարիտյանը եկավ, չհասցրեց ոչինչ անել ու միանգամից փոխեցին: Մինասյանին, անշուշտ, ինչ-որ ժամանակ է պետք:

Կարեն Վարդանյան