«Ֆեներբահչեի» ֆուտբոլիստները քաղաքական գործիչների պատկերներով մարզահագուստ չեն կրի. Թուրքիայից ակումբին աջակցելու է մեկնել մեկ երկրպագու

Եվրոպայի լիգայի առաջնության 1/16 եզրափակչի պատասխան խաղի շրջանակներում «Լոկոմոտիվը» կհյուրընկալի թուրքական «Ֆեներբահչեին»:

«Մոսկվայում կայանալիք «Լոկոմոտիվ» - «Ֆեներբահչե» հանդիպման ժամանակ, բացառվում է ստամբուլյան ակումբի ֆուտբոլիստների կողմից թուրք քաղաքական գործիչների պատկերներով մարզահագուստի ցուցադրությունը: Մեր ֆուտբոլիստներն ամեն ինչ շատ լավ են հասկանում, և կարիք չկա նրանց մի քանի անգամ նույն բանն ասելու»,- հայտնել է «Ֆեներբահչե» ակումբի մամուլի ծառայությունը: Այս մասին տեղեկացնում է sport.ru-ն:

Ռուսական ակումբն էլ իր հերթին երկրպագուներին կոչ է արել մարզադաշտում զերծ մնալ քաղաքական կարգախոսներից և պաստառներից:

Հավելենք, որ Թուրքիայից խաղը դիտելու ժամանել է միայն մեկ երկրպագու: Թուրքական ակումբը սադրանքներից խուսափելու համար չի կազմակերպել երկրպագուների ժամանում Մոսկվա: Հյուրերի համար նախատեսված սեկտորի տոմսերը վաճառքի չեն հանվել: Ակումբին կաջակցեն Ռուսաստանում գտնվող երկրպագուները: Այս մասին տեղեկացնում է lenta.ru-ն:

Այս թիմերի միջև նախորդ հանդիպումն ավարտվել է 2:0 հաշվով՝ հոգուտ թուրքական թիմի: Խաղի ավարտից հետո «Լոկոմոտիվի» կիսապաշտպան Դմիտրի Տարասովը ցուցադրել է իր մարզաշապիկը, որի վրա պատկերված է եղել ՌԴ նախագահ Վլադիմիր Պուտինը: