Ես չեմ սատարում Սավչենկոյին

Երբևէ դուք լսե՞լ եք, որ Ուկրաինայում ակցիա անեն ի պաշտպանություն որևէ հայի: Ես չեմ լսել: Ասեմ ավելին՝ այդ պետությունը միշտ էլ աչքի է ընկել իր ադրբեջանամետ դիրքորոշմամբ: Այդ ադրբեջանամետ դիրքորոշումն արտահայտվում էր նույնիսկ Արցախյան պատերազմի տարիներին, արտահայտվում է և այսօր՝ նաև միջազգային տարբեր ատյաններում հայ-ադրբեջանական հակամարտությանը վերաբերող հարցերի շուրջ Ուկրաինայի ներկայացուցիչների քվեարկությունների միջոցով: Նրանք դա բացահայտ են անում, նրանք դրանից վատ չեն զգում, այդ դեպքում հարց է առաջանում ինձ մոտ՝ իսկ ինչո՞ւ պետք է մենք վատ զգանք, որ, օրինակ, ժամանակին Հայաստանը քվեարկել է Ղրիմի՝ Ռուսաստանին միացման օգտին: Իսկ ինչո՞ւ չպետք է քվեարկեր, այդ ո՞ր հարցում մենք Ուկրաինայի հետ ունեինք այնպիսի ընդհանուր շահեր, որոնք մեզ կստիպեին նման բան անել:

Ու հիմա ամեն անգամ կարող են 5-6 մարդ հավաքվել ու ժողովրդի անունից հանդես գալ, պահանջել Ուկրաինայում չգիտես թե ում ազատությունը: Ես չէի անդրադառնա այս հարցին, քանի որ այն նույնիսկ արժանի չէ ուշադրության: Բայց ստիպված անդրադարձա, որովհետև այս մասին արդեն գրեցին նաև միջազգային լրատվամիջոցները, և միգուցե դրսում ոմանց մոտ տպավորություն ստեղծվի, թե հայերը սատարում են ուկրաինացի օդաչու Նադեժդա Սավչենկոյին:

Ես էլ եմ այս ժողովրդից, ես էլ եմ հայ, և եթե 5-6 հոգին կարող են խոսել հայ մարդկանց անունից, ապա ես էլ ասում եմ իմ անունից՝ համոզված լինելով, որ ասածիս հետ համամիտ կլինեն ոչ թե 5-6, այլ՝ հազարավոր հայ մարդիկ. ես չեմ սատարում Նադեժդա Սավչենկոյին, ես չեմ պահանջում նրա ազատությունը, մանավանդ նա մեղադրվում է երկու լրագրողի սպանության մեջ: Ավելին՝ ես ցանկանում եմ, որ իմ երկու գործընկերների սպանության մեջ մեղավորը պատժվի օրենքի ողջ խստությամբ: Բացի այդ, Սավչենկոն հայերի աջակցության կարիքն էլ չունի, մանավանդ որ ինքն ունի Վալցման-Պորոշենկոյի նման աջակից, ով նույնիսկ ցանկություն է հայտնել երկու լրագրողի սպանության մեջ մեղադրվողին տեսնել Ուկրաինայի կառավարության կազմում:

Վերաբերում է Ռուսաստանի դեսպանատան դեմ ակցիաներ անելուն՝ այ դրան ես դեմ չեմ, ավելին՝ երբեմն արժե ակցիաներ կազմակերպել, մանավանդ առիթներ էլ լինում են: Օրինակ՝ նույն մարդիկ ժամանակին կարող էին բողոքի ակցիա կազմակերպել ՌԴ դեսպանատան առջև և պահանջել Լևոն Հայրապետյանի ազատությունը: Խոստանում եմ, որ եթե այսուհետ ՌԴ դեսպանատան մոտ բողոքի ակցիաների հետաքրքիր թեմաներ լինեն, անպայման կառաջարկեմ:

Կարեն Վարդանյան