ՀՀԿ-ին կեղծիքները միգուցե այդքան էլ չեն խանգարում

Հանրապետականները շարունակում են ամեն գնով փորձել պաշտպանել Ընտրական օրենսգրքի նախագծի այն կետը, ըստ որի լրատվամիջոցների ներկայացուցիչների քանակը ընտրատեղամասում չպետք է լինի 8-ից ավելի, ընդ որում՝ ոչ թե 8 լրատվամիջոց, այլ՝ 8 անձ, այսինքն եթե հեռուստաընկերությունը ուղարկելու է 2 կամ 3 մարդուց կազմված նկարահանող խումբ, ապա ստացվում է, որ որոշ ընտրատեղամասերում կարող են լինել ընդամենը 3-4 լրատվամիջոցների ներկայցուցիչներ: Հանրապետականները դա նորմալ թիվ են համարում, 3 օր առաջ այդ մասին Էդուարդ Շարմազանովն էր ասել, որ 8-ը իրենց համար նորմալ թիվ է, երեկ էլ Գագիկ Մելիքյանն ասաց, թե լրագրողների քանակը սահմանափակվել է, որովհետև մտավախություն կա, որ լրատվամիջոցներին կարող են օգագործել քաղաքական կուսակցությունների համամասնական ցուցակներում ընդգրկված թեկնածուները՝ որպես վստահված անձինքմ ուստի լրագրողների մեծ քանակությունը կարող է բացասական ազդեցություն ունենալ ընտրական գործընթացի վրա...

Ճիշտն ասած, փորձում եմ ասվածը հասկանալ, բայց ոչ մի կերպ չի ստացվում և չեմ կարողանում նկատել այդ հնարավոր բացասականը: Դրա փոխարեն հնարավոր դրականը լավ էլ տեսնում եմ՝ լրագրողների մեծ քանակությունը կնպաստի ու նպաստում է ընտրական գործընթացի ավելի արդյունավետ վերահսկման տեղամասերում և մի շարք ընտրախախտումներ բացահայտվում են և ընտըրախախտումների փորձեր էլ կանխվում են հենց տեղում ներկա լրագրողների շնորհիվ:

Բայց, ինչպես տեսնում ենք, ՀՀ-ականները այսպես չեն մտածում և միշտ էլ կարող ինչ-որ պատճառաբանություններ գտնել, տաբեր վարկածներ առաջ քաշել: Կարծում եմ, վերոհիշյալ կետը արդարացնող ու պաշտպանող դեռ էլի տարբերակներ կլսենք իշխող կուսակցության ներկայացուցիչների կողմից, ինչը, իհարկե, իրենց օգտին չի խոսա, որովհետև դա ևս մեկ անգամ ցույց կտա, որ ՀՀԿ-ին կեղծիքները միգուցե այդքան էլ չեն խանգարում:

Կարեն Վարդանյան