Խմբագրական. Ժամանակն է դուրս գալ ստորադաս վիճակից

Եթե Հայաստանի ներքին քաղաքական վիճակը, մեղմ ասած, գոհացուցիչ չէ, ապա արտաքին քաղաքականության մեջ, այնուամենայնիվ, երբեմն դրական միտումներ կարելի է տեսնել: Երեկ, ՀՀ ԱԺ-ում տեղի ունեցած ՀԱՊԿ անդամ երկրների խորհրդարանական պատվիրակությունների ներկայացուցիչների հանդիպման ավարտից հետո, ԱԺ փոխնախագահ Էդվարդ Շարմազանովը` խոսելով հանդիպման մանրամասների մասին արեց մի հայտարարություն, որը բավականին ուշագրավ էր. «Մենք հանցագործություն ենք համարում Թուրքիայի կողմից ռուսական Սու-24 ռազմական ուղղաթիռի կործանումը, ինչպես որ հանցագործություն ենք համարում ղարաբաղա-ադրբեջանական շփման գծում Ադրբեջանի կողմից հայկական ուղղաթիռի խոցումը: Մեր կարծիքով` ՀԱՊԿ անդամ երկրների պատվիրակությունները բոլոր միջխորհրդարանական հարթակներում պետք է ելույթ ունենան փոխհամաձայնեցված, որովհետեւ մենք դաշնակիցներ ենք»:

Նախ, վաղուց էր պետք նման հայտարարություն անել, բայց լավ է ուշ, քան`երբեք:

Հայտարարության Թուրքիային վերաբերող մասի հետ կապված. մենք, կարծես թե միշտ խուսափում էինք մեր ոչ բարով հարևանների գործողություններին հստակ գնահատական տալ, նույնիսկ մեր օդային սահմանը խախտելու դեպքում լռություն եղավ: Իսկ հիմա, վերջապես իրերն անվանվեցին իրենց անուններով՝ Սու-24-ի կործանումը հանցագործություն էր, որը համարժեք էր Ադրբեջանի կողմից հայկական ուղղաթիռի խոցմանը:

Այսինքն, Ադրբեջանը և Թուրքիան գնահատվեցին, որպես հանցագործություն իրականացնողներ:

Հետաքրքիր էր նաև հայտարարության երկրորդ մասը. «ՀԱՊԿ անդամ երկրների պատվիրակությունները բոլոր միջխորհրդարանական հարթակներում պետք է ելույթ ունենան փոխհամաձայնեցված, որովհետեւ մենք դաշնակիցներ ենք»:

Սա կարելի է համարել նաև ուղղակի մեսիջ Ռուսաստանին և ՀԱՊԿ անդամ մյուս պետություններին, որ դաշնակցային պարտավորությունները փոխադարձ են լինում և չպետք է այդ մասին մոռանալ, քանի որ ՀԱՊԿ անդամ մյուս երկրները, այդ թվում՝ Ռուսաստանը, իրականում բավականին հաճախ են այդ մասին մոռանում և մենք հանդես ենք գալիս միակողմանի «դաշնակցային» պարտավորություն կատարողի դերում: Ժամանակն է` որոշ հարցերում կոշտացնել մեր դիրքորոշումները, ասեմ ավելին՝ ցանկության ու կամքի դեպքում նույնիսկ կարող ենք աստիճանաբար դուրս գալ գործընկերների հետ հարաբերությունների մեջ այս ստորադաս վիճակից, որում այսօր ենք:

Կարեն Վարդանյան