Բախտ եմ ասել, է՜, բախտ…

Այն, որ Հայաստանում դժվարությամբ կարելի է գտնել ցանկացած տրամաչափի չինովնիկի, ով ապրում ու գոյատևում է բացառապես սեփական աշխատավարձի հաշվին, նորություն չէ: Մերոնք միշտ էլ մյուսներից տարբերվել են նրանով, որ սիրել են գոնե մի փոքր չարաշահել սեփական դիրքն ու հեղինակությունը և օգտվել կյանքի բարիքներից՝ թեկուզ դա լինի ի հաշիվ մյուսների:

Համաձայնե՛ք՝ շատ սովորական մարդկային թուլություն, որն ինչ-որ կերպ կարելի է հասկանալ. է՛լ ինչի համար է ցանկացած մեկը ձգտում պաշտոնի, եթե իրեն պետք է զրկի փոքրիկ չարաճճիություններ անելու հաճույքից:

Բոլորս էլ գիտենք, որ Հայաստանի Հանրապետության Ազգային ժողովն այն բացառիկ վայրն է, ուր կարելի է միանգամից տեսնել տասնյակ միլիոնատերերի՝ համախմբված մեկ վայրում: Բայց եթե որոշ դեպքերում այդ միլիոնատերերը հայտնի գործարարներ են ու սեփական փողերն աշխատել են ամենևին էլ ոչ ի հաշիվ պետական բյուջեի, ապա մարդկանց մեկ այլ խմբի պարագայում պատկերը տրամագծորեն հակառակն է. նրանք փաստացի միլիոնատերներ են՝ բոլորին անհայտ պատճառներով:

Բանից պարզվում է, որ այդպիսի միլիոնատերերից մեկը ոչ այլ ոք է, քան նույն ինքը՝ Հերմինե Նաղդալյանը, ում կողմից գրանցած եկամուտներին միայն նախանձել կարելի է: 

Այսպես՝ Ազգային ժողովի նախագահի տեղակալ Հերմինե Նաղդալյանի դրամական միջոցները, ըստ նրա պաշտոնական հայտարարագրի, 2015 թվականի վերջին կազմել են 32 մլն դրամ և 5 հազար դոլար: Ուշագրավ է, որ նման եկամուտների մասին է խոսքը մի պարագայում, երբ հայտնի է, որ սույն տիկնոջ ամսական աշխատավարձը կազմում է ընդամենը 722 հազար դրամ: Ավելին՝ Նաղդալյանն անցած տարվա ընթացքում ավելի քան 38.5 մլն դրամի չափով եկամուտ է ստացել իբրև շահաբաժին, ևս 179 մլն դրամ էլ ստացել է իբրև փոխառություն կամ վարկ: Փառահեղ է, այնպես չէ՞: Բայց մի՛ շտապեք սահմանափակվել այսքանով, քանի որ ամեն ինչ դեռևս առջևում է. Նաղդալյանի ամուսինը՝ Դավիթ Բեգլարյանը, ստանալով ամսական ընդամենը 344 հազար դրամ աշխատավարձ, պարզվում է' կարողացել է բավական լուրջ ունեցվածքի տեր դառնալ. վերջինս անցած տարի ստացել է 86 մլն 219 հազար դրամի եկամուտ, որից 42 մլն դրամը եղել է փոխառություն, մոտ 40 մլն 100 հազար դրամի շահաբաժին: Նաղդալյանի ամուսնու փոխառության գումարն անցած տարեվերջին կազմել է 43 մլն 360 հազար դրամ, իսկ վերջինիս դրամական միջոցները կազմել են 10 մլն դրամ: Բացի այդ՝ նա անցած տարի ձեռք է բերել նաև 7.5 մլն դրամ արժողությամբ ինչ-որ ընկերության բաժնեմաս:

Տղամարդի՛կ, համարձակությո՛ւն ունեցեք ու խոստովանե՛ք, որ չէիք հրաժարվի Հերմինե Նաղդալյանի պես հեռանկարային կին ունենալու հնարավորությունից, եթե իհարկե, ձեզ էլ, Դավիթ Բեգլարյանի նման, բախտ վիճակվեր հանդիպել նման կնոջ: Դե հիմա ասե՛ք, Հերմինե Նաղդալյանը քանի՞ կերած-խմած տղամարդ արժե, հազա՞ր, ես կասեի բյուր հազար…

Ինչևէ, փաստենք միայն, որ այդպես էլ այսքանից հետո մեզ անհասկանալի մնաց, թե որտեղից, այնուամենայնիվ, նման փողեր այս ընտանիքին, միգուցե բիզնե՞ս ունեն կամ էլ զբաղվում են շենքեր կառուցելով ու վաճառելո՞վ, կամ էլ, ասենք, ՀԷԿ-երի սեփականատերե՞ր են, ո՞վ գիտե, մեզ մնում է միայն ենթադրել՝ հետևությունները թողնելով ձեզ:

 Դավիթ Բաբանով