Պատերազմական վիճակ է, կարկուտ է եկել. մարզպետի արդարացումները

Արմավիրի մարզի Լենուղի գյուղի 4-րդ կարգի վթարային հանրակացարանային շենքերի հարցը լուծում չի ստանում։ Կառավարության կողմից հատկացված 195 մլն դրամից շենքի վերակառուցմանն ուղղվել է ընդամենը 55 մլն դրամը, որը լուծում է եղած վթարային շենքերից միայն մեկի հարցը։ Մնացած երկու վթարային շենքի բնակիչները չգիտեն՝ ինչ անել, արդեն ում դիմել։ Եղանակային վատ պայմաններն էլ իր հերթին է դժվարացնում առանց այն էլ ծանր պայմաններում ապրող լենուղցիների կյանքը։ ԼՈՒՐԵՐ.com-ը տեղեկացավ, որ քիչ առաջ գյուղի բնակիչները հանդիպում են ունեցել Արմավիրի մարզպետ Աշոտ Ղահրամանյանի հետ՝ պարզելու, թե երբ է գումարը հատկացվելու շենքի վերկառուցման համար, քանի որ այդ պայմաններում ապրելն անհնար է։ 

Մարզպետն իր հետ հանդիպման եկածների վրա նախ հոխորտացել է, թե ինչու են լրատվամիջոցներին ասում, թե ինքը հրաժարվում է բնակիչների հետ հանդիպելուց։ Իսկ բուն թեմայի վերաբերյալ մարզպետ Ղահրամանյանն ասել է՝ կառավարությունը պետք է որոշի՝ երբ հատկացնել գումարը շենքերի վերակառուցման համար, ինքը որևէ բան անել չի կարող։ Գումարի չփոխանցելը մարզպետը նաև պատճառաբանել է նրանով, որ երկրում պատերազմական վիճակ է, դրանից բացի կարկուտ է եկել, բերքը ոչնչացրել, հազար ու մի խնդիր կա լուծելու։ Լենուղի գյուղի բնակիչները հանդիպումից դժգոհ գնացել են։ 

Հարկ ենք համարում Արմավիրի մարզպետին տեղեկացնել, որ երկրում տոտալ պատերազմական վիճակ չկա և դա արդարացում չէ՝ մարդկանց շենքերի կառուցման համար բյուջեից հատկացված գումարը չփոխանցելու կամ գործընթացը չսկսելու համար։ 1988 թվականի երկրաշարժի ժամանակ, Արմավիրի մարզի Լենուղի գյուղում գտնվող հանրակացարանային մի քանի շենք 4-րդ կարգի վթարային դարձան: Երեք մասնաշենքերն էլ վթարային են, մարդկանց սենյակները փլվելու վտանգի տակ են: Բնակիչներն արդեն 25 տարի է՝ բնակվում են վթարային շենքում՝ հույս ունենալով, որ կառավարությունն իրենց բնակարանով կապահովի: Բնակիչները պարբերաբար կառավարության մոտ բողոքի ակցիաներ են իրականացնում՝ Հովիկ Աբրահամյանից պահանջելով խնդրի անհապաղ լուծում: Սակայն, «սայլը տեղից չի շարժվում»։ 

Քրիստինա Աղալարյան