«ՀԱՊԿ» ակադեմիան կկառուցվի ևս 2,5 տարի. տարածքի բնակիչները սկսել են բողոքել (ֆոտո)

Պատմամշակութային արժեք հանիսացող՝ Հրաչյա Աճառյանի անվան դպրոցի շենքի ճակատային մասը 2014 թվականին Երևանի քաղաքապետարանի, Մշակույթի նախարարության թույլտվությամբ քանդվեց։ Շենք կառուցվել է 1930-ականներին: Հ. Աճառյանի անվան թիվ 72 դպրոցը տրամադրվել է «Հավաքական անվտանգության պայմանագրի կազմակերպության ակադեմիա» հիմնադրամին՝ այն որպես ակադեմիա վերակառուցելու նպատակով։ Քաղաքապետարանը 2014 թվականի մայիսի 5-ին հիմնադրամին քաղաքապետարանի կողմից տրամադրեց շինթույլտվություն։ Արդեն երկու տարի է՝ շինարարություն է գնում։ Տարածքում գտնվող տների բնակիչները ԼՈՒՐԵՐ.com-ի հետ զրույցում տեղեկացրին, որ շինարարության թույլտվության ժամկետն սպառվել է, և այնտեղ ապօրինի շինարարություն է գնում։

Այդ առնչությամբ հարցում ուղարկեցինք Երևանի քաղաքապետարան, որտեղից մեզ պատասխանեցին, որ շինթույլտվությունը երկարաձգվել է 29 ամսով։ Այսինքն՝ 2,5 տարի «ՀԱՊԿ ակադեմիա» հիմնադրամը դեռ շինարարություն է իրականացնելու։

«Երևանի քաղաքապետարանին ուղղված Ձեր հարցմանն ի պատասխան աշխատակազմի քաղաքաշինության և հողի վերահսկողության վարչությունից տեղեկացնում են, որ Կենտրոն վարչական շրջանի, Հերացու փողոցի հ.2 հասցեի «ՀԱՊԿ ակադեմիա» հիմնադրամի շենքը նախատեսվում է իրականացնել Հր.Աճառյանի անվան նախկին հ.72 դպրոցի շենքի հատակագծային նիշից՝ ճակատային գծից հետ նահանջով, 1 ստորգետնյա, 10 վերգետնյա և 1 տեխնիկական հարկերով, որի համար առկա է կառուցապատող՝ «ՀԱՊԿ ակադեմիա» հիմնադրամի կողմից Երևանի քաղաքապետարանի հետ 04.04.2014 թվականին համաձայնեցված և 05.05.2014թ. վերահամաձայնեցված նախագծերը ու 05.05.2014թ. տրված շինարարության թույլտվությունը, որի ժամկետը 23.05.2016թ. շինարարության թույլտվությամբ երկարացվել և սահմանվել է՝ 29 ամիս:

Միաժամանակ, հիշյալ քաղաքաշինական փաստաթղթերով նախատեսվում է իրականացնել Հր.Աճառյանի անվան նախկին հ.72 դպրոցի հուշարձան շենքի՝ դիմային և երկու կողային ճակատների ճարտարապետական նախկին տեսքի վերականգնման ու վերստեղծման աշխատանքներ՝ պահպանելով նախկինում գոյություն ունեցող հարկայնությունը՝ 1 ստորգետնյա և 4 վերգետնյա հարկեր։ Հարկ է նշել, որ հիշյալ տեղեկատվությունն իրազեկող ցուցատախտակը փակցված է կառուցվող օբյեկտի շինարարական հրապարակի տեսանելի վայրում»,- ասված է մեզ ուղարկված պատասխանում։

Վերջում մեկ փաստ ևս նշենք, որին ավելի հանգամանալից և առարկայական կանդրադառնանք առաջիկայում։ Մեզ ահազանգած բնակիչները նշում են, որ ակադեմիայի շենքը կառուցվում է նախապես տրամադրված շինթույլտվության խախտումով։ Մասնավորապես՝ շինթույլտվությամբ նախատեսվում է կառուցել 1 ստորգետնյա և 4 վերգետնյա հարկ։ Բնակիչներն իրենց հերթին ասում են, որ ակադեմիայի շենքն ավելի բարձրահարկ է լինելու, ինչն արդեն խնդիրներ է առաջացնում իրենց տների լուսավորության հետ կապված։ Նրանք մասնագետների են անգամ հրավիրել՝ մասնագիտական եզրակացություն ստանալու համար։

ՀԱՊԿ ակադեմիայի ֆոնդ ստեղծելու վերաբերյալ հուշագիր կնքվել է 2013 թվականին՝ այն ժամանակ Անվտանգության խորհրդի քարտուղար Արթուր Բաղդասարյանի ու ՀԱՊԿ գլխավոր քարտուղար Նիկոլայ Բորդյուժայի միջև: Արթուր Բաղդասարյանն այն ժամանակ հայտարարեց, որ ակադեմիան կլինի «լուրջ վերլուծական կենտրոն», իսկ Նիկոլայ Բորդյուժան հավելեց, որ Ակադեմիան նախատեսված է ՀԱՊԿ և դրանից դուրս երկրներում մասնագետներ պատրաստելու համար:

Քրիստինա Աղալարյան