ՄԱԿ-ի ԱԽ-ն դատապարտել է ահաբեկչություններն Իրաքում եւ Սաուդյան Արաբիայում

ՄԱԿ-ի Անվտանգության խորհուրդը հուլիսի 5-ին դատապարտել է վերջին ահաբեկչական գրոհներն Իրաքում եւ Սաուդյան Արաբիայում, որոնք կատարվել են Իդ ալ Ֆիթր մահմեդական տոնի նախաշեմին:

Մամուլի համար երկու՝ գործնականում նույնական հայտարարություններում Անվտանգության խորհրդի անդամները ցավակցություններ են հայտնել տասնյակ զոհվածների ընտանիքներին, ինչպես նաեւ Իրաքի եւ Սաուդյան Արաբիայի ժողովուրդներին եւ կառավարություններին: ՄԱԿ-ի ԱԽ-ում ընդգծել են, որ «այս սպանությունների համար պատասխանատուները պետք Է ենթարկվեն արդարադատության» եւ բոլոր երկրներին կոչ են արել համագործակցելու այս ուղղությամբ՝ միջազգային իրավունքի շրջանակներում իրենց հանձնառություններին համապատասխան:

Վերջին տվյալներով՝ ահաբեկչական գործողության հետեւանքով Բաղդադում զոհվել է 250 մարդ: Ականապատված ավտոմոբիլը, որի ղեկի առջեւ եղել է մահապարտ ահաբեկիչ, հուլիսի լույս 3-ի գիշերը պայթել է մայրաքաղաքի Էլ Քառադայի շրջանում: Հարձակման պատասխանատվությունն ստանձնել Է «Իսլամական պետություն» ահաբեկչական խմբավորումը:

Հուլիսի 3–4-ը ահաբեկչական գործողությունների ալիք է անցել Սաուդյան Արաբիայում: Մահապարտներն իրենց պայթեցրել են Ջիդդայում ԱՄՆ-ի Գլխավոր հյուպատոսության շենքի, թագավորության արեւելքի Էլ Քաթիֆ քաղաքում շիաների մզկիթներից մեկի, ինչպես նաեւ Մեդինայում Մուհամեդ մարգարեի մզկիթի մոտ: Նախնական տեղեկատվությամբ՝ այդ գրոհների հետեւանքով զոհվել են սաուդյան անվտանգության ուժերի չորս աշխատակիցներ, հաղորդել է ՏԱՍՍ-ը: