ՆԱՏՕ-ն Ռուսաստանի հետ կապեր կկառուցի ուժի և երկխոսության հավասարակշռության հիման վրա. ԱՄՆ ներկայացուցիչ

ՆԱՏՕ-ն Ռուսաստանի հետ հարաբերություններ կկառուցի ուժի և երկխոսության հավասարակշռության հիման վրա: Այդ մասին հայտարարել է դաշինքում ԱՄՆ մշտական ներկայացուցիչ Դուգլաս Լյուտը, տեղեկացնում է ՌԻԱ «Նովոստի»-ն:

«ՆԱՏՕ-ի տեսանկյունից հարաբերություների հիմքը պետք է լինի հավասարակշռությունը ուժի և երկխոսության միջև։ Մենք կանենք այն, ինչ անհրաժեշտ է ուժի կողմից, և հավասարապես մենք բաց կլինենք Ռուսաստանի հետ երկխոսության համար, քանի որ մտածում ենք, որ այդ հավասարակշռությունն արտացոլում է ճիշտ և պատասխանատու մոտեցում ՆԱՏՕ-ի և Ռուսաստանի հարաբերություններին»,- ասել է Լյուտը ճեպազրուցի ժամանակ՝ նվիրված հուլիսի 8-9-ը Վարշավայում կայանալիք ՆԱՏՕ-ի գագաթնաժողովին ԱՄՆ նախագահ Բարաք Օբամայի մասնակցությանը։

Ավելի վաղ նման մոտեցման մասին էին հայտարարել ԱՄՆ գործող վարչակազմի ներկայացուցիչները, մասնավորապես՝ Պենտագոնի ղեկավար Էշթոն Քարթերը, որն անվանել էր այն «ուժեղ և հավասարակշռված» և պարզաբանել, որ անհրաժեշտ է զսպել «ռուսական ագրեսիան», սակայն միաժամանակ համագործակցել անվտանգության այն ոլորտներում, որտեղ այն փոխադարձ հետաքրքրություն է ներկայացնում։

Մոսկվայում Ռուսաստանի զսպման ՆԱՏՕ-ի և ԱՄՆ-ի այդպիսի քաղաքականությունն անվանում են ագրեսիվ և Եվրոպայում ուժերի հավասարակշռությունը խախտող։