Երևանում լրագրողների նկատմամբ կատարված բռնությունների որոշ դեպքեր արդեն ներկայացված են նաև միջազգային կազմակերպություններին

«Ընդդեմ իրավական կամայականության» հասարակական կազմակերպության գործողությունների կոչում, որը ՀՀ ոստիկանության ՊՊԾ գնդի շուրջ ծավալվող իրադարձությունների օրերին հղվել է ոչ միայն ՀՀ իշխանություններին, այլև մարդու իրավունքների ազգային ու միջազգային կազմակերպություններին, մասնավորապես՝ ՄԱԿ-ի և Եվրոպայի Խորհրդի մասնագիտացված կառույցներին, ներկայացված են նաև Երևանում լրագրողների նկատմամբ կատարված բռնությունների որոշ դեպքեր:

Հիշյալ ՀԿ-ի գործադիր տնօրեն, ՀՀ մարդու իրավունքների առաջին պաշտպան Լարիսա Ալավերդյանի և նույն կազմակերպության նախագահ Միքայել Արամյանի՝ «Գործողությունների կոչ» վերտառությամբ հիշյալ դիմումում այդ կապակցությամբ մասնավորապես նշված է.

«Լրագրող Արտակ Համբարձումյանին, ով իր մասնագիտական պարտականությունն էր իրականացնում Խորենացի փողոցում, ապտակել է ոստիկանը՝ խոչընդոտելով տեսանկարահանմանը: Այն հարցին, թե ինչու են մարդիկ բերման ենթարկվում, նա ստացավ հարված իր որովայնին:

Մեկ այլ լրագրող՝ Գևորգ Թոսունյանը iravaban.net կայքից, ում իրավունքները նույնպես պաշտպանում է ԸԻԿ փաստաբանը, ծեծի է ենթարկվել ոստիկանների խմբի կողմից հուլիսի 20-ի գիշերը՝ հուլիսի 21-ի առավոտյան: Ոստիկանները վերցրել են նրա տեսախցիկի հիշողության քարտը, քանի որ վերջինիս նկարահանումներ էր արել, թե ինչպես են քարեր նետվում քաղաքացիների վրա: Այս գործով ևս հանցագործության մասին հաղորդումը հուլիսի 21-ին արդեն ներկայացվել է ոստիկանություն:

«Ընդդեմ իրավական կամայականության» ՀԿ-ի դիմումում ներկայացված են վերոնշյալ, ինչպես նաև քաղաքացիների նկատմամբ բազմաթիվ իրավախախտումների վերաբերյալ տեղեկությունների աղբյուրները' համապատասխան հղումներով:
Հիշյալ ՀԿ-ն արդեն իսկ դիմել է մարդու իրավունքների ազգային ու միջազգային կազմակերպություններին, մասնավորապես՝ ՄԱԿ-ի և Եվրոպայի Խորհրդի մասնագիտացված կառույցներին, որպեսզի նրանք ձեռնարկեն անհրաժեշտ քայլեր' պարտավորեցնելու ՀՀ իշխանություններին կատարել գործողություններ, որոնք կհանգեցնեն սույն հայտարարության մեջ ներկայացված խնդիրների ողջամիտ և խաղաղ լուծմանը: