«Սասնա ծռերի» անդամ Թաթուլ Թամրազյանը կալանավորվեց

«Սասնա ծռերի» անդամ 26-ամյա Թաթուլ Թամրազյանն այսօր՝ հուլիսի 6-ին, կալանավորվեց: Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը բավարարել է Թաթուլ Թամրազյանին երկու ամսով կալանավորելու նախաքննական մարմնի միջնորդությունը: Նրան մեղադրանք է առաջադրվել ՀՀ Քր.օր.-ի 235 հոդվածի 3-րդ մասով (ապօրինի զենք զինամթերք ձեռք բերել, իրացնել, պահել, փոխադրել) և 219-րդ հոդվածի 3-րդ մասի 1-ին կետով (կազմակերպված խմբի կողմից շենքեր, շինություններ, տրանսպորտի, հաղորդակցության կամ կապի միջոցներ զավթելը):

Թաթուլ Թամրազյանին Երևանի «Էրեբունի» հիվանդանոցից դատարան են տեղափոխել «Շտապօգնության» մեքենայով՝ պատգարակով: 

Դատական նիստից հետո նրա փաստաբան Մոնիկա Մարգարյանը հայտարարել է, որ Թաթուլ Թամրազյանը որոշման հրապարակումից հետո նիստերի դահլիճում ձեռքը բարձրացրել է և ասել՝ «ամեն ինչ լավ է լինելու, սա միայն սկիզբն է»:

Դատարանից Թաթուլ Թամրազյանին տեղափոխել են «Դատապարտյալների հիվանդանոց»:

Ավելի վաղ Երևանի «Էրեբունի» հիվանդացի Վերակենդանացման բաժանմունքից Արմեն Լամբարյանին և Թաթուլ Թամրազյանին տեղափոխել էին հիվանդասենյակ:

Թաթուլ Թամրազյանը վիրավորվել էր հուլիսի 17-ին՝ ոստիկանության ՊՊԾ գունդը գրոհելու ընթացքում տեղի ունեցած փոխհրաձգության ժամանակ: