Քաղաքագետը Հայաստանից ԼՂ հարցով դիրքորոշման խստացում է ակնկալում

Քաղաքագետ Հրանտ Մելիք-Շահնազարյանն ակնկալում է, որ օգոստոսի 10-ին Ռուսաստանում ՀՀ նախագահ Սերժ Սարգսյանի և Ռուսաստանի նախագահ Վլադիմիր Պուտինի հանդիպման ընթացքում հայկական կողմը ղարաբաղյան հարցի առնչությամբ Ռուսաստանին կներկայացնի իր առավել խստացված դիրքորոշումը:

«Իմ տեղեկություններով՝ այս հանդիպումը կազմակերպվել է հայկական կողմի առաջարկությամբ, և որի ընթացքում, ըստ իս, Հայաստանը Ռուսաստանին պաշտոնապես կտեղեկացնի բանակցային դիրքորոշման փոփոխության մասին: Ռուսական կողմին կներկայացվի հայկական կողմի առավել խստացված, պահանջատիրական դարձած դիրքորոշումը: Իհարկե, մամուլի առջև կխոսվեն ինտեգրացիոն, ԵԱՏՄ, ՀԱՊԿ-ին վերաբերող խնդիրների մասին, սակայն հիմնական հարցը Ռուսաստանին Հայաստանի որոշումները ներկայացնելն է, ինչից հետո Ռուսաստանն իր հետևությունները կանի: Հայաստանն էլ, կապված Ռուսաստանի արձագանքի հետ, կփորձի հասկանալ հետագա քայլերի ընթացքը»,- լրագրողների հետ զրույցում նշեց նա:

Քաղաքագետի խոսքով՝ օգոստոս և սեպտեմբեր ամիսները հնարավոր է՝ լինեն լարված: «Ադրբեջանը պահանջում է ոչ թե որոշ տարածքներ, այլ ամբողջ Ղարաբաղը, և դա անում է բոլոր միջազգային հարթակներում: Նա բանակցությունների որևէ հնարավորություն չի թողնում: Մյուս կողմից էլ Հայաստանն ասում է, որ տարածքային զիջումների նախկին պատրաստակամությամբ այլևս հանդես չի գալու, և, ըստ էության, բանակցային գործընթաց չկա: Դրա այլընտրանքը լարվածության մեծացումն է»,-եզրափակեց Հրանտ Մելիք-Շահնազարյանը:

Օգոստոսի 10-ին Ռուսաստանում կկայանա Սարգսյան-Պուտին հանդիպումը: Բանակցությունների ընթացքում նախատեսվում է քննարկել երկու պետությունների միջև մի շարք ոլորտներում՝ քաղաքական, առևտրատնտեսական, հումանիտար, երկկողմ փոխգործակցության օրակարգի առանցքային, ինչպես նաև եվրասիական տարածքում ինտեգրացիոն գործընթացների զարգացմանը վերաբերող հարցեր:

Նախագահները մտքեր կփոխանակեն նաև միջազգային և տարածաշրջանային մի շարք արդիական խնդիրների շուրջ: