Ոստիկանության Երևան քաղաքի վարչության պետ Աշոտ Կարապետյանի պաշտոնանկությունը միանգամայն օրինաչափ էր

«Ընդդեմ իրավական կամայականության» (ԸԻԿ) հասարակական կազմակերպությունը, ինչպես արդեն տեղեկացրել է Լուրեր.com-ը, գործողությունների կոչ է հղել ինչպես ՀՀ իշխանություններին, այնպես էլ մարդու իրավունքների ազգային ու միջազգային կազմակերպություններին, մասնավորապես՝ ՄԱԿ-ի և Եվրոպայի Խորհրդի մասնագիտացված կառույցներին: Գործողությունների կոչում ներկայացված են նաև Երևանում լրագրողների նկատմամբ կատարված բռնությունների որոշ դեպքեր, սակայն այն բովանդակային առումով շատ ավելի ընդգրկուն բնույթ ունի:

Հիշյալ հասարակական կազմակերպության գործադիր տնօրեն, ՀՀ մարդու իրավունքների առաջին պաշտպան, Հիմնադիր խորհրդարանին նախորդած Նախախորհրդարանի անդամ Լարիսա Ալավերդյանի և ԸԻԿ հկ նախագահ Միքայել Արամյանի՝ «Գործողությունների կոչ» վերտառությամբ հիշյալ փաստաթղթում, ինչպես տեղեկացանք տիկին Ալավերդյանից, շարադրված են մինչև հուլիսի 23-ը տեղի ունեցած բոլոր գործողությունները:

«Մենք ստացել ենք պատասխան «Խոշտանգումների զոհերի միջազգային վերականգնողական խորհուրդ» (IRCT) կազմակերպությունից,- Լուրեր.com-ի հետ զրույցում ասաց Լարիսա Ալավերդյանը:

«Մենք միջազգային այդ կազմակերպության ցանցի անդամ ենք»: Մեկ էջանոց պատասխանի վերջում նշված է.-«IRCT-ը շարունակելու է մշտադիտարկել իրավիճակը՝ համագործակցելով ԸԻԿ-ի հետ և գործադրելու է բոլոր ջանքերը՝ աջակցելու խոշտանգումների զոհերին՝ իրականացնելով խոշտանգումների դեպքերի փաստաթղթավորում և վերականգնում հետագա հետաքննության ու փոխհատուցման համար»:

IRCT-ի արձագանք-նամակում նշված է նաև. «Խոշտանգումների զոհերի միջազգային վերականգնողական խորհուրդը (IRCT) խորապես մտահոգված է ոստիկանության ներկայիս կամայականությունների վերաբերյալ զեկույցներով, Հայաստանում քաղաքացիների նկատմամբ խոշտանգումներով և վատ վերաբերմունքով, և կոչ է անում իշխանություններին՝ զերծ մնալ հետագա կամայականություններից և իրականացնել բոլոր մեղադրանքների անաչառ ու արդյունավետ քննություն՝ միջազգային չափանիշներին և Ստամբուլյան արձանագրությանը համապատասխան»:

Եվս մեկ մեջբերում IRCT-ի նամակից. «Ոստիկանների կողմից անգամ միջոցներ են ձեռնարկվել՝ խոչընդոտելու լրագրողների մասնագիտական գործունեությանը և դեպքերի լուսաբանում իրականացնելուն՝ կիրառելով անհամաչափ ուժ և անգամ բռնագրավելով ու ոչնչացնելով լրագրողների սարքավորումները: Այս գործողությունները մեծապես նպաստում են անպատժելիության մթնոլորտի ստեղծմանը, որը կարող է խթանել խոշտանգումները և համապատասխանաբար բարդացնել հետաքննությունների և զոհերի փոխհատուցման իրականացումը»:

Կատարվածից հետո միանգամայն օրինաչափ ու սպասելի էր ՀՀ ոստիկանության Երևան քաղաքի վարչության պետ Աշոտ Կարապետյանի պաշտոնանկությունը, ինչը նույնիսկ ավելի շուտ պետք է արվեր: ՀՀ ոստիկանության տեղեկացմամբ, ոստիկանությունում ընթացող ծառայողական քննությունների արդյունքներով, ոստիկանության պետի հրամաններով՝ ոստիկանության մի շարք ծառայողներ ենթարկվել են կարգապահական տույժերի: Խնդիրն այն է, որ իրենց գործընկերների նկատմամբ կիրառված կարգապահական պատասխանատվության միջոցներից ոստիկաններն այսօրվա ու վաղվա համար ճիշտ հետևություններ կատարեն, այսինքն՝ ոչ օրինազանցություն, ոչ էլ՝ անգործություն, այլ ծառայական պարտականությունների կատարում բացառապես իրավունքի և օրենքի շրջանակներում: