Ընկել են կեղծ փաստաբանի որոգայթի մեջ

Այս հրապարակումը հատուկ միամիտների համար է, որոնք մեր հասարակության շարքերում, ցավոք, քիչ չեն: Նրանք հեշտությամբ ընկնում են խարդախների որոգայթի մեջ, խարդախության զոհ դառնում՝ այն դեպքում, երբ հեշտությամբ կարելի է խույս տալ դրանից, բավարար է ընդամենը փոքր-ինչ կասկածել, մեկ-երկու հարց տալ, մեկ-երկու տեղ զանգել: Որոշակի այս դեպքում բավարար էր ուղղակի պահանջել փաստաբանի արտոնագիրը, ու համոզվելով դրա բացակայության հարցում, խուսափել մի քանի հազար դոլար կորցնելուց:

Քրեական գործի նախաքննությամբ պարզվել է, որ Լիլիթ Մհերի Ֆարմանյանը Երևանի բնակիչ Աշխեն Արմաղանյանին ներկայանալով իբրև ՀՀ փաստաբանների պալատի փաստաբան, բայց չհանդիսանալով այդպիսին, փաստաբանական ծառայություն մատուցելու՝ ՀՀ վարչական դատարան հայցադիմում ներկայացնելու և շահերը պաշտպանելու պատրվակով, Երևանի տարբեր վայրերում Ա.Արմաղանյանից մաս- մաս ստացել է փաստաբանական ծառայություններ մատուցելու համար 1427625 դրամին համարժեք 3500 ԱՄՆ դոլար, իսկ տարբեր պետական մարմիններում վճարումներ կատարելու համար՝ 1334000 դրամ, խարդախությամբ հափշտակել է ընդհանուրը 2 761 625 դրամ գումար:

Բացի վերը նշվածից, Լ. Ֆարմանյանը, ըստ մեղադրական եզրակացության, ուրիշի գույքը խաբեությամբ հափշտակելու նախնական դիտավորությամբ, տեղեկանալով, որ Բագրատ Թորոսյանն ու Լիանա Ստեփանյանը ՀՀ վերաքննիչ քաղաքացիական դատարանում հանդիսանում են որպես կողմեր, նրանց ներկայանալով որպես փաստաբան, վստահություն ստեղծելով, թե կարող է հիշյալ դատարանում հանդես գալ նրանց անունից, 2014թ. սեպտեմբերին պահանջել ու ստացել է 816 060 դրամին համարժեք 2000 ԱՄՆ դոլար, ապա 1 220 400 դրամին համարժեք 3000 ԱՄՆ դոլար, ընդհանուրը՝ 2 036 460 դրամին համարժեք գումար:
Վերը նշված արարքների համար Լիլիթ Ֆարմանյանին մեղադրանք է առաջադրվել ՀՀ քրեական օրենսգրքի 178-րդ հոդվածի «Խարդախությունը» 2-րդ մասի 2-րդ կետի հատկանիշով:

Ի դեպ, եթե որևէ փաստաբանի կարիք կունենաք և որևէ մեկը ձեզ փաստաբանի արտոնագիր կներկայացնի, արտոնագրի կեղծ լինելու կասկածներ առաջանալու պարագայում դժվար չէ զանգահարել ՀՀ փաստաբանների պալատ կամ մուտք գործել պալատի կայք ու համոզվել՝ այդ անուն ազգանունով ու տվյալներով փաստաբան իրականում գոյություն ունի՞, թե ոչ: