Ավելի քան 17.5 մլն դրամի յուրացում բանակից. մեղադրանքի հաստատման պարագայում սրբապղծությունից շատ չի տարբերվի

Բանակում նյութատեխնիկական մատակարարումների, գույքի հետ կապված չարաշահումների թեման բարձրացվեց հատկապես ապրիլյան պատերազմից հետո, ստացավ հասարակական ավելի մեծ հնչեղություն: Ինչպես արդեն հայտնի է, պաշտոններից հեռացվել են ՀՀ պաշտպանության նախարարության և զինված ուժերի մի շարք սպաներ, նրանց թվում նաև' բարձրաստիճան սպաներ, հարուցվել են քրեական գործեր և ոմանց նկատմամբ սկսվել է քրեական հետապնդում, նախաքննությունը շարունակվում է:

Ստորև ներկայացվող քրեական գործի նախաքննությունը ՀՀ զինվորական դատախազությունն արդեն ավարտել է: Քննությամբ պարզվել է, որ Արտաշես Այվազյանը 2013թ. նոյեմբերի 1-ից զբաղեցնելով ՀՀ ՊՆ N զորամասի ռազմատեխնիկական գույքի պահեստի պետի պաշտոնը, հանդիսանալով վարչատնտեսական լիազորություններով օժտված պաշտոնատար անձ, «ՀՀ ԶՈՒ զորային տնտեսության մասին» կանոնակարգի 60-61-րդ հոդվածների համաձայն, պատասխանատու է եղել պահեստում նյութական միջոցների առկայության և ժամանակին հաշվառման համար, պարտավոր լինելով հետևել այդ միջոցների առկայությանը, բացառել դրանց պակասորդները, վարել պահեստում գտնվող նյութական միջոցների քանակական հաշվառում:

Սակայն, ըստ մեղադրական եզրակացության, Ա. Այվազյանը պաշտոնեական դիրքն օգտագործելով, տվյալ պաշտոնում ծառայության նշանակվելու օրվանից մինչև 2015թ. օգոստոսի 13-ը ժամանակահատվածում պարբերաբար պահեստից դուրս է բերել իրեն հանձնված, պահեստում պահվող և ՀՀ ԶՈՒ մարտական պատրաստության վարչությանը պատկանող առանձնապես խոշոր չափերով՝ 17 մլն 550 080 դրամին համարժեք տարբեր տեսակի մալուխներ, թիրախներ, ամբարձիչներ, մետաղական խողովակներ, յուղաներկեր, մետաղական ճոպաններ և յուրացրել:

Բացի վերը նշվածից, համաձայն քր. գործի նյութերի, նա վերադաս հրամանատարության մոտ իր ծառայողական պարտականություններն անթերի, ճիշտ և ժամանակին կատարողի պատրանք ստեղծելու նպատակով, յուրաքանչյուր ամիս պահեստներում պահվող ապրանքանյութական արժեքների վերաբերյալ կազմել է ակնհայտ կեղծ հաշվետվություններ:
Վերը նշված արարքների համար Արտաշես Այվազյանին մեղադրանք է առաջադրվել ՀՀ քրեական օրենսգրքի 179-րդ հոդվածի («Յուրացնելը կամ վատնելը») 3-րդ մասի 1-ին կետի և 314-րդ հոդվածի («Պաշտոնեական կեղծիքը») 1-ին մասի հատկանիշներով: Թերևս մնում է ավելացնել, որ դատարանի օրինական ուժի մեջ մտած վճռով Արտաշես Այվազյանին առաջադրված մեղադրանքի հաստատման պարագայում նրա արարքը սրբապղծությունից շատ չի տարբերվի: