Ո՞ւմ է վստահվել ՀԱԷԿ-ի տնօրենի հույժ կարևոր ու պատասխանատու պաշտոնը. ազգային անվտանգության հետ կապված հարցեր չե՞ն առաջանում

Եթե ատոմակայանի տնօրենն իսկապես ինքն է կատարել այն հանցանքը, որի առնչությամբ նրան մեղադրանք է առաջադրվել, ապա, բնականաբար, հարց է առաջանում, թե ՀԱԷԿ-ի տնօրենի հույժ կարևոր ու պատասխանատու պաշտոնը մեզանում ո՞ւմ է վստահվել: Մինչ նրան տնօրենի պաշտոնի վստահումը, նրա անձը չի՞ հայտնվել խոշորացույցի տակ, ԱԱԾ-ն իր մաղով չի՞ անցկացրել նրան, և, առհասարակ, ինչպե՞ս է նա նշանակվել ՀԱԷԿ-ի տնօրեն, կադրային նման սխալ քաղաքականության համար ո՞վ է պատասխանատու և ով է պատասխան տվել:

Քրեական գործի նախաքննությամբ պարզվել է, որ Գագիկ Մարկոսյանը հանդիսանալով ՀԱԷԿ ՓԲԸ տնօրեն, համաձայն ընկերության կանոնադրության, լինելով դրա գույքի, այդ թվում՝ ֆինանսական միջոցների տնօրինող, ընկերության անունից գործարքներ և պայմանագրեր կնքող անձ, միաժամանակ օժտված լինելով հրամաններ և հրահանգներ արձակելու, ինչպես նաև կատարման համար պարտադիր ցուցումներ տալու և դրանց իրագործումը վերահսկելու լիազորությամբ, ղեկավարելով կազմակերպված խումբը և առևտրային կազմակերպությունում զբաղեցրած պաշտոնեական դիրքն օգտագործելով, 2010 2014թթ. ժամանակահատվածում կազմակերպված խմբի անդամների հետ վատնելու եղանակով հափշտակել է առանձնապես խոշոր չափերով' 759 մլն 221 500 դրամ, իսկ 2008-2013թթ. ժամանակահատվածում'24 մլն 364 500 դրամ:

Նույն քր. գործի շրջանակում մեղադրանք է առաջադրվել նաև Ռուբիկ Մովսեսյանին այն բանի համար, որ նա հանդիսանալով ՀԱԷԿ ՓԲԸ առևտրային տնօրեն և, ի պաշտոնե, մատակարարման ոլորտի պատասխանատու ծառայող, հակված լինելով իր կարգադրիչ և այլ լիազորությունները կազմակերպության շահերին հակառակ օգտագործելուն, գործելով կազմակերպված խմբի կազմում և առևտրային կազմակերպությունում զբաղեցրած պաշտոնեական դիրքն օգտագործելով, 2010-2014թթ.ժամանակահատվածում կազմակերպված խմբի անդամների հետ վատնելու եղանակով հափշտակել է 759 221 500 դրամ:

Սույն քր. գործի շրջանակում մյուս մեղադրյալը Էդիկ Ղազարյանն է: Համաձայն քր. գործի նյութերի, նա հանդիսանալով ՀԱԷԿ ՓԲԸ վերանորոգման նախապատրաստման և կարգավորման բաժնի պետ և ատոմակայանի գործունեությունն ապահովելու համար անհրաժեշտ ապրանքների և նյութերի ձեռք բերման նպատակով գնումների գործընթացներն իրականացնելու համար պատասխանատու ստորաբաժանման ղեկավար, գործելով կազմակերպված խմբի անդամների հետ, իր պաշտոնեական դիրքն օգտագործելով, վատնելու եղանակով հափշտակել է 751 790 800 դրամ գումար:

Վերը նշված արարքների համար Գագիկ Մարկոսյանին, Ռուբիկ Մովսեսյանին և Էդիկ Ղազարյանին մեղադրանք է առաջադրվել ՀՀ քրեական օրենսգրքի 179-րդ հոդվածի («Յուրացնելը կամ վատնելը») 3-րդ մասի 1-ին և 2-րդ կետերի հատկանիշներով: Զարմանալի է, որ ավելի քան 751 մլն դրամի հափշտակության մեջ մեղադրվող Ռուբիկ Մովսեսյանի նկատմամբ որևէ խափանման միջոց չի ընտրվել, իսկ մյուսներից ստորագրություն է վերցվել չհեռանալու մասին: Սույն քր. գործով առաջին դատական նիստը Արմավիրի մարզի ընդհանուր իրավասության դատարանում նշանակված է վաղը: