Քրեակատարողական վարչությունն իրավասու չէ թույլտարել պատգամավորներին տեսակցելու Դավիթ Սանասարյանին, Արմեն Մարտիրոսյանին և այլոց

«Նուբարաշեն» ՔԿՀ-ի ղեկավարությունը պատգամավորներին չի թույլատրում տեսակցել Դավիթ Սանասարյանին, Արմեն Մարտիրոսյանին և մի քանի այլ կալանավորների, քանի որ նրանց մասով արգելանք կա դրված:

ԼՈւՐԵՐ.com-ի տեղեկացմամբ՝ այս կապակցությամբ ՔԿՎ հանրային կապերի բաժնից հանդես են եկել պարզաբանմամբ, որը ներկայացնում ենք ստորև.

Համացանցում տարածված տեղեկատվությունը իրականությանը չի համապատասխանում: Ինչպես քրեակատարողական վարչության ղեկավարության, այնպես էլ «Դատապարտյալների հիվանդանոց» ՔԿ հիմնարկի վարչակազմի կողմից որևէ խոչընդոտ չի ստեղծվել ԱԺ պագամավորների կողմից կալանավորվածներին պահելու վայր անարգել մուտք գործելու իրավունքի իրացման կապակցությամբ, ինչը և կատարվել է վերջինիս կողմից: Սակայն քրեակատարողական հիմնարկ մուտք գործելուց հետո պատգամավորները ցանկություն են հայտնում տեսակցել կալանավորված անձանց հետ, որոնց տեսակցության իրավունքը սահմանափակված է նախաքննության մարմնի որոշմամբ, ուստի վերջինիս պահանջը օրենսդրության պահանջներին համապատասխան իրավաչափորեն մերժվել է քրեակատարողական հիմնարկի վարչակազմի կողմից:

Այն է՝ «Ձերբակալված և կալանավորված անձանց պահելու մասին» ՀՀ օրենքի 15-րդ հոդվածի 9-րդ պարբերության համաձայն' «Քննության շահերից ելնելով' ձերբակալված կամ կալանավորված անձանց տեսակցությունը օրինական ներկայացուցչի, մերձավոր ազգականների, զանգվածային լրատվության միջոցների ներկայացուցիչների և այլ անձանց հետ, բացառությամբ օրենքով նախատեսված դեպքերի, կարող է արգելվել քրեական վարույթն իրականացնող մարմնի որոշմամբ' այդ մասին գրավոր իրազեկելով ձերբակալվածներին պահելու վայրի կամ կալանավորվածներին պահելու վայրի վարչակազմին»:

Հիշյալ իրավական սահմանափակումները, քրեակատարողական և քրեադատավարական օրենսդրության պահանջներին համապատասխան, վերաբերելի չեն պաշտպանի ինստիտուտին, իսկ «Խոշտանգումների և այլ դաժան, անմարդկային կամ արժանապատվությունը նվաստացնող վերաբերմունքի կամ պատժի դեմ կոնվենցիայի» կամընտիր արձանագրության ուժով՝ չեն կարող տարածվել ՀՀ մարդու իրավունքների պաշտպանի վրա՝ որպես կանխարգելման անկախ ազգային մեխանիզմ: Վերը նշվածի մասին պատգամավորները պատշաճ տեղեկացվել են նաև քրեակատարողական հիմնարկների վարչակազմի կողմից:

Հիշեցնենք, որ ԲՀԿ մամուլի խոսնակ Վանիկ Էլիզբարյանը հայտարարությամբ էր հանդես եկել և նշել էր, որ «Նուբարաշեն» ՔԿՀ ղեկավարությունն արգելել է ԲՀԿ պատգամավորներին տեսակցելու կալանավորված Դավիթ Սանասարյանին, Արմեն Մարտիրոսյանին և Տիգրան Մարգարյանի, ով ունի շաքարային դիաբետ հիվանդություն: