«Կարո Եղնուկյանի կատարածը հանցագործություն չէ»

Այն գործողությունները, որոնք կատարելու կասկածանքով ձերբակալվել է Կարո Եղնուկյանը, հանցագործություն չի կարելի համարել: Այս մասին այսօր «Նոյյան Տապան» մամուլի ակումբում տեղի ունեցած մամուլի ասուլիսի ժամանակ հայտարարեց Եղնուկյանի փաստաբան Տիգրան Հայրապետյանը։

Փաստաբանը նշեց, որ Եղնուկյանին մեղադրում են այն բանի համար, որ վերջինս տեղեկանալով, որ ՊՊԾ գնդի մոտակայքում տեխնիկայի շարժ է նկատվում, ստացած տեղեկությունները հրապարակել է:

Նախաքննական մարմնի կարծիքով՝ Եղնուկյանը նպատակ ունենալով խոչընդոտել պատանդների ազատ արձակման և խմբի վնասազերծման ուղղությամբ տարվող աշխատանքները՝ միջոցներ է ձեռնարկել Ազատության հրապարակում հավաքի մասնակիցներին գնդի մոտակա տարածք տեղափոխելու համար։ Ինչպես նաև Եղնուկյանին մեղադրում են ապատեղեկատվություն տարածելու մեջ, որը թերևս, փաստաբանի պնդմամբ, զանցանք է։

«Բանասերի նման մեղադրանք են առաջադրում: Մեր դատական համակարգը տասը տարի հետ է գնացել: Այդքան գումարներ են ներդրվել մեր դատաիրավական ոլորտը բարեփոխելու համար, սակայն երևում է, թե ինչպես է այս գործերում մեր համակարգն այդքան հետ գնացել»,-նշեց փաստաբանը։

Հիշեցնենք, որ Կարո Եղնուկյանը կալանավորվել է հուլիսի 22-ին՝ ՀՀ քրեական օրենսգրքի 218 և 219 հոդվածների հատկանիշներով ՝ պատանդ վերցնելուն, շենքեր, շինություններ, տրանսպորտի, հաղորդակցության կամ կապի միջոցներ զավթելուն աջակցելու համար: