Պոռնկարագրական բնույթի լուսանկարներ տեղադրելով սոցկայքի սարքած էջում, ցանկացել է բացասական կարծիք ստեղծել բարոյական կերպարի վերաբերյալ

Ինտերնետի և սոցիալական կայքերի մեր դարում, ցավոք, մեզանից որևէ մեկն ապահովված չէ իր նկատմամբ այսպիսի ոտնձգությունից: Ֆեյսբուք և այլ սոցիալական կայքեր տնօրինողները դեռ չեն գտել այն տեխնոլոգիան, որը թույլ կտա ի սկզբանե արգելել ոմանց չարամտության գործնական դրսևորումը տվյալ կայքերում:

Քրեական գործի նախաքննությամբ պարզվել է, որ Զինա Սաֆարյանը Արմինե Բաբայանի հետ Աբովյանի քաղաքի Կոտայքի փողոցի թիվ 60 հասցեում գտնվող տանը նախկինում որպես վարձակալներ համատեղ ապրելու ժամանակահատվածում ունեցած կենցաղային խնդիրների կապակցությամբ վրդովված լինելով նրա պահվածքից և դիտավորություն ունենալով Ա. Բաբայանի ընկերների և հարազատների մոտ վերջինիս բարոյական կերպարի վերաբերյալ ստեղծել բացասական կարծիք, սոցիլական կայքում ստեղծել է «Armine Arsen» պայմանական անվանումով անհատական էջ:

Ըստ մեղադրական եզրակացության, նա նշված էջում որպես գլխավոր լուսանկարներ ներբեռնել և տեղադրել է Արմինե Բաբայանի՝ նույն սոցիալական կայքում ունեցած անհատական էջում առկա լուսանկարները, նույն օրվանից համացանցի՝ քննությամբ չպարզված կայքերից ներբեռնել և «Armine Arsen» պայմանական անվանումով անհատական էջում տեղադրոլ է մի շարք էրոտիկ բնույթի, ինչպես նաև պոռնկարագրական բնույթի երկու լուսանկարներ, որոնք հասանելի են եղել սոցիալական կայքի այլ օգտատերերի: Կարճ ասած, նպատակ է ունեցել այդ կերպ խայտառակել Ա. Բաբայանին: Թե դա նրան որքանո՞վ է հաջողվել, չգիտենք:

Վերը նշված արարքի համար Զինա Սաֆարյանին մեղադրանք է առաջադրվել ՀՀ քրեական օրենսգրքի 263-րդ հոդվածի («Պոռնկագրական նյութեր կամ առարկաներ տարածելը») 1-ին մասի հատկանիշով: