Քրեական պատասխանատվության է կանչվել արդարադատության նախարարության ՔԿԱԳ Սևանի տարածքային բաժնի պետը

Կազմված մեղադրական եզրակացության հիման վրա կարելի է ասել, որ ՀՀ արդարադատության նախարարության համակարգում բացահայտվել է կոռուպցիայի հերթական դրսևորումը:

Քրեական գործի նախաքննությամբ պարզվել է, որ Մանուշ Կիրակոսյանը զբաղեցնելով ՀՀ արդարադատության նախարարության քաղաքացիական կացության ակտերի գրանցման Սևանի տարածքային բաժնի պետի պաշտոնը և հանդիսանալով պաշտոնատար անձ, անձնական այլ դրդումներից ելնելով, կատարել է պաշտոնական փաստաթղթերի կեղծում։ Բնականաբար, հարց է առաջանում, թե նա ո՞ւմ օգտին է պաշտոնական փաստաթղթերի կեղծում կատարել, և ի՞նչ նպատակով պետք է օգտագործվեին կամ օգտագործվել են կեղծված փաստաթղթերը:

Այս հարցերի պատասխանը հայտնի է դառնում նույն քր. գործի շրջանակում Սերոբ Բաղդասարյանին առաջադրված մեղադրանքից: Համաձայն քր. գործի նյութերի, նա ՌԴ մուտք գործելու թույլտվության համար դիմելով պաշտոնատար անձ հանդիսացող Մ. Կիրակոսյանին, ձեռք է բերել կեղծ փաստաթղթեր և ապօրինի հատել է ՀՀ պետական սահմանը։

Վերը նշված արարքների համար Մանուշ Կիրակոսյանին մեղադրանք է առաջադրվել ՀՀ քրեական օրենսգրքի 314-րդ հոդվածի («Պաշտոնեական կեղծիքը») 1-ին մասի, իսկ Սերոբ Բաղդասարյանին` 325-րդ հոդվածի («Փաստաթղթեր, դրոշմներ, կնիքներ, ձևաթղթեր, տրանսպորտային միջոցների հաշվառման համարանիշներ կեղծելը, իրացնելը կամ օգտագործելը») 1-ին մասի և 329-րդ հոդվածի («Պետական սահմանն ապօրինի հատելը») 1-ին մասի հատկանիշներով: Մ. Կիրակոսյանի նկատմամբ որպես խափանման միջոց ընտրվել է կալանքը: